Balqashta kezekte turǵan 21 otbasy páter aldy

BALQASh. QazAqparat – Balqashta halyqtyń áleýmettik osal toptarynan 21 otbasy jańa páter kiltine ıe boldy. Turǵyn úı «Nurly jer» memlekettik baǵdarlamasy aıasynda salyndy, dep habarlaıdy QazAqparat tilshisi.

Qonys ıelerine páterler Qońyrat shaǵyn aýdanyndaǵy Balqash kóshesindegi jáne 9 shaǵyn aýdanyndaǵy №45 tanhaýstaǵy tórt úıden jalǵa berildi.

«Jyly ári jaıly, keń, balalardyń qýanyshty kúlkisi estiletin, baqyt pen ózara túsinistik ornaıtyn laıyqty turǵyn úıdiń bolýy kez kelgen otbasynyń, ásirese kópbalaly otbasynyń ómirinde óte mańyzdy. Bul qamqorlyq – táýelsiz memleketimizdiń azamattaryn qoldaýdyń eń úzdik sharalarynyń biri. Qalada «Nurly jer» baǵdarlamasyn iske asyrý odan ári jalǵasatyn bolady», – dep atap ótti Balqash qalasynyń basshysy Oraz Táýirbekov.

Sharshy metrdiń ıegerleri qatarynda Balqashtyń kóp balaly turǵyny Álııa Ryspekova da bar. Ol alty balanyń anasy. Úlken qyzy 16 jasta, eń kishisi 2 jasta. «Kúmis alqa» belgisimen marapattalǵan. Kezekte áıel bir jyldan astam ýaqyt turdy, sondyqtan ol áli kúnge deıin bolǵan jaǵdaıǵa sene alar emespin deıdi.

«Buǵan deıin biz búkil otbasymyzben páter jaldap, 70 myń tóledik. Bul otbasylyq bıýdjet úshin óte qıyn. Qazir jalǵa alý qoljetimdi. Men jóndeý jumystaryn júrgizemin, úıge túrli zattardy satyp alamyn jáne kútpegen baqytqa qýanyp otyrmyn», – deıdi Álııa Ryspekova.

Búginde Balqashta turǵyn úı alý kezeginde 1 767 adam tur.