Balqash ulǵaıyp jatyr: Torańǵalyq kýrort kenti qala aýmaǵyna qosylady

QARAǴANDY. QazAqparat – Qaraǵandy oblysynda Balqash qalasynyń shekarasy ulǵaıyp jatyr. Qalaǵa Aqtoǵaı aýdanyna qarasty Torańǵalyq kenti qosylady. Bul kópten kútken ózgeris kýrorttyq aýyldy damytýǵa jáne týrısterdiń demalysyn jaıly etýge múmkindik beredi.

Bul sheshimdi oblystyq máslıhat depýtattary kezekti úshinshi sessııada qabyldady.

«Qaraǵandy oblysy Aqtoǵaı aýdany men Balqash qalasynyń ákimshilik-aýmaqtyq qurylysyna mynadaı ózgeris engizilsin: Aqtoǵaı aýdanynyń Torańǵalyq aýyldyq okrýgi joıylsyn, keıinnen onyń aýmaǵy Balqash qalasynyń ákimshilik baǵynysyna engizile otyryp, ony eseptik derekterden alyp tastalsyn», - delingen qujatta.

Ekonomıka basqarmasynyń basshysy Tatıana Ablaeva barlyq zańdy rásimder júrgizilgenin atap ótti.

Buǵan deıin Balqash qalasynyń shekarasyn ózgertý týraly úkimettik qaýly shyqqan bolatyn.

«Sheshim Torańǵalyq aýyldyq okrýgindegi jyljymaıtyn múlik obektilerin tirkeý rásimderin júrgizý úshin ákimshilik retteýdi sheshý maqsatynda uıǵaryldy», - dep túsindirdi Tatıana Ablaeva.