Balqash turǵyndary jylý úshin 113 mln teńge artyq tólegeni anyqtaldy

BALQASh. QazAqparat – Qaraǵandy oblysynyń sybaılas jemqorlyqpen kúres qyzmeti Balqash qalasynyń jylýmen qamtý kásipornynyń dırektoryna qatysty qylmystyq is qozǵady. Ol atqarǵan qyzmetine nemquraılyq tanytty dep aıytpalýda, dep habarlaıdy QazAqparat tilshisi.

Belgili bolǵandaı, «Balqash jylý» kompanııasy Tabıǵı monopolııalardy retteý komıteti departamenti bekitken ınvestıtsııalyq baǵdarlamany oryndamaǵan. Jylýmen jabdyqtaý men jańǵyrtýǵa 116 mıllıon teńgeden astam qarjy salynǵan. Alaıda tekserý qorytyndysy boıynsha ınvestıtsııalyq baǵdarlamanyń 98% oryndalmaǵany anyqtaldy, Osylaısha Balqash turǵyndarynyń shyǵyny 113 mıllıon teńgeden asqan. Sybaılas jemqorlyqqa qarsy qyzmettiń aralasýynan keıin jeke tulǵalar men uıymdar úshin jylý energııasyna tarıf 300 teńgege derlik tómendetildi. Buryn ol gıgakalorııa úshin 3 143 teńge bolatyn. Endi 80 myń balqashtyq aldaǵy jylytý maýsymynda óz qarajatyn únemdeı alady.

«Tergeý barysynda «Balqash jylý» jylý berý uıymyna qatysty qylmystyq is qozǵaldy. Osyǵan baılanysty Tabıǵı monopolııalardy retteý departamentine jylý energııasyna negizsiz joǵary tarıfti tómendetýge usynys joldadyq. Qarastyrý nátıjesi boıynsha ótemdik tarıf engizildi», - dep túsindirdi Qaraǵandy oblysynyń Sybaılas jemqorlyqqa qarsy qyzmeti basshysynyń orynbasary Marǵulan Muqashev.