Balqash pen Alakólge aparatyn joldardyń sapasy qandaı

NUR-SULTAN. QazAqparat – QR Indýstrııa jáne ınfraqurylymdyq damý mınıstri Beıbit Atamqulov Qazaqstannyń týrıstik oryndaryna aparatyn joldardyń sapasy jónindegi suraqqa jaýap berdi, dep habarlaıdy QazAqparat tilshisi.

«Bıyl 4 myń shaqyrym respýblıkalyq jol salynyp, jóndeýden ótedi dep josparlanǵan. Naqty Balqash pen Alakólge toqtalsaq, bıyl 2 myń 600 shaqyrym jol boıynsha qozǵalysty ashamyz. Onyń ishinde, Qaraǵandy-Balqash-Qapshaǵaı jáne Taldyqorǵan-Úsharal-Óskemen baǵyttary bar. Bul baǵyttarda kúsheıtilgen jumys júrip jatyr. Birden, jol bólikterin atar bolsam, uzyndyǵy 700 shaqyrym bolatyn Taldyqorǵan-Úsharal joly bar. Úsharaldan Dostyqqa deıingi 60 shaqyrymǵa asfalt tóseý jumystary bastalyp ketti. Qalbataý jaqtan da jol bóligin jóndeýdi aıaqtadyq», - dedi ol Ortalyq kommýnıkatsııalar qyzmetinde ótken esep berý brıfınginde.

Qaraǵandy trassasy boıynsha mınıstr Karaǵandy-Balqash jolynyń bıyl ashylatynyn habarlady.

«Árıne, onyń keıbir bólikteri tehnıkalyq sebeptermen keshigýi múmkin. Degenmen, Qaraǵandy-Balqash-Qapshaǵaı jolynyń negizgi bóligin jyl sońyna deıin qoldanysqa beremiz. Kelesi jyly súıikti kýrorttyq oryndarymyzǵa tamasha jol ústimen jetemiz dep oılaımyn», - dedi mınıstr.