Balqash pen Alakólde brakonerlikpen aınalysqan 14 adamnyń ústinen is qozǵaldy

TALDYQORǴAN. QazAqparat - Almaty oblysynda Balqash-Alakól basseıniniń sý aıdyndarynda brakonerlikpen aınalysqan 14 adamnyń ústinen qylmystyq is qozǵaldy. Qazir atalǵan faktiler boıynsha tergeý júrip jatyr, - dep habarlaıdy QazAqparat tilshisi.

Bıyl Almaty oblysynda 4 aıda balyq sharýashylyǵynda 200-den astam zań buzý faktileri tirkelip, 59 is sotqa joldandy. Taǵy 14 qylmystyq is boıynsha tergeý jalǵasyp jatyr. Brakonerlerden zańsyz aýlanǵan 4 tonna balyq, 5 júzý quraly tálkilendi.

Búgin Qapshaǵaı qalasynda ótken arnaıy shtab otyrysynda sala mamandary keshendi jospar quryp, sý aıdyndarynda ınspektorlar sanyn arttyryp, zańbuzýshylarǵa qatań sharalar qoldaný máselesin talqylady.

«Zańsyz balyq aýlaýmen aınalysqan tulǵalardy qolǵa túsirip, olardan qaıyqtaryn nemese kólik quraldaryn tárkilep, bizdiń balansqa aýdarýǵa bolady. Memleket bizge osyndaı múmkinshilik berip otyr. Osy tárkilengen zattardy ınspektsııa balansyna, teńgerimine ala alady Sondyqtan biz osy baǵytta úlken jumys istep jatyrmyz», - dedi QR ekologııa, geologııa jáne tabıǵı resýrstar mınıstrligi Balyq sharýashylyǵy komıteti tóraǵasynyń orynbasary Aıan Bahııanov.

Aldaǵy ýaqytta Ekologııa, geologııa jáne tabıǵı resýrstar mınıstrligi Іshki ister mınıstrligimen birlesip ózen-kólderde arnaıy reıdtik tekseristerdi jıi ótkizetin boldy.