Balqash kóliniń sý deńgeıi Baltyq júıesimen 341 metrge jetti

<p>ASTANA. KAZINFORM &ndash; Jyl basynan Balqashqa 13,5 tekshe shaqyrym sý jiberildi, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.</p>

Jyl basynan beri Balqash kóline Іle ózeni arqyly Qapshaǵaı sý qoımasynan 13,5 tekshe shaqyrym sý jiberildi. Osynyń nátıjesinde kóldiń ortasha sý deńgeıi Baltyq júıesimen 341,60 m jetti. Balqash kóliniń 70%-ǵa jýyq sýy transshekaralyq Іle ózeni arqyly qalyptasady. Bıyl Qytaımen shekara mańyndaǵy Dobyn gıdrobeketi boıynsha ortasha sý aǵyny sekýndyna 384 tekshe metr boldy. Bul ótken jylǵy kórsetkishten 17%-ǵa artyq.

Aıta ketý kerek, Sý resýrstary jáne ırrıgatsııa mınıstrligi Qazaqstan men Qytaı arasyndaǵy transshekaralyq ózenderdiń sýyn bólý máselesi boıynsha úkimetaralyq kelisim jobasyn ázirlep jatyr. Kelisim jasaýdaǵy basty maqsat — Balqash kólin qalypty deńgeıde saqtaýǵa kepildik beretin sý kóleminiń túsýin qamtamasyz etý.

«Biz jyl basynan beri Qytaı, Reseı jáne Ortalyq Azııa memleketterimen transshekaralyq ózender boıynsha 28 otyrys ótkizdik. Kelissózder nátıjesinde bıyl Qapshaǵaı sý qoımasy sońǵy 10 jylda alǵash ret 18 mlrd tekshe metrden artyq sý jınap, 100%-ǵa toldy», — dedi Sý resýrstary jáne ırrıgatsııa mınıstri Nurjan Nurjigitov.

Eske salsaq, Sarapshylar AES-tiń Balqash kóline qandaı áseri bolatynyn aıtyp bergen edi.