Balqash kólinde eki balyqshy sýǵa batyp ketti

BALQASh. QazAqparat - Qaraǵandy oblysy Saryshaǵan kentiniń eki turǵyny Balqash kóline batyp ketti. 35 jáne 58 jastaǵy er adamdar balyq aýlaýǵa shyqqan. Alaıda qutqarýshylar olardyń qaıyǵyn tappady, dep habarlaıdy QazAqparat tilshisi.

Er adamdar qaıyqpen balyq aýlaýǵa shyǵyp, baılanysqa shyqpaı habarsyz ketken. Qutqarýshylarǵa balyqshylardyń joǵalǵanyn týystary habarlaǵan.

Joǵalǵandardy izdeýge Prıozersk qalasynan qutqarýshylar attandy. Іzdeý jumysyna jergilikti turǵyndar da atsalysty.

Jaǵalaý beldeýi qaralyp, qutqarýshylar kóldiń túbine birneshe ret súńgigen.

«Jaǵadan shamamen eki shaqyrym jerde TJD izdeý toby eki er adamnyń denesin tapty. Biz qaıyqty tappadyq. Ólimniń mán-jaıyn polıtsııa organdary anyqtaıdy. Sot saraptamasy taǵaıyndaldy», - dep habarlady Qaraǵandy oblysy TJD baspasóz qyzmeti.

Aımaqtyń qutqarýshylary balyqshylarǵa balyq aýlaý aldynda qaıyqtyń jaǵdaıyn muqııat tekserip, ár adamǵa qutqarý sheńberi, belbeý nemese kókirekshe bolýy kerektigin eske salady.

«Daýyldy aýa raıynda jáne táýliktiń qarańǵy ýaqytynda sýǵa shyǵýǵa tyıym salynady. Jazataıym oqıǵalardyń aldyn alý úshin balyq aýlaǵanda jaǵadan alys ketpeńizder»,-dep tolyqtyrdy TJD baspasóz qyzmeti.

Ótken jyldyń osy kezeńinde bir balyqshy sýǵa batyp ketken. Jalpy ótken jyly 16 adam, onyń ishinde 6 bala qaza tapty.