«Balqash – Býrylbaıtal» jolynyń 127 shaqyrymdyq bóligi paıdalanýǵa beriledi

ASTANA. QazAqparat - Qyrkúıektiń sońyna deıin Qaraǵandy jáne Jambyl oblystarynyń aýmaǵyndaǵy «Ortalyq – Ońtústik» kólik dáliziniń 127 shaqyrymyn paıdalanýǵa berý josparlanǵan. Qazir jol-qurylys jumystarynyń sońǵy satysy júrip jatyr. Bul týraly QR Indýstrııa jáne ınfraqurylymdyq damý mınıstrliginiń Avtomobıl joldary komıteti habarlady.

Máselen, «Balqash – Býrylbaıtal» jol ýchaskesiniń 288 shaqyrymy jańǵyrtylýǵa tıis. Qurylys jumystarymen Sinohydro Corporation Limited DBBU QQ, «Sın Mıdas Stroı «BK» JShS, Todini Central Asia jáne Sinohydro Bureau 16 JShS aınalysyp keledi.

Bul rette «Ortalyq – Ońtústik» kúre jolynyń qurylysy «Batys Eýropa – Batys Qytaı»halyqaralyq tranzıttik avtojolyn jańǵyrtý jobasynyń aıasynda júrgizilip jatqany nesterińizge sala keteıik. Joǵaryda aıtqandaı, qyrkúıek aıynyń sońyna deıin «Balqash – Býrylbaıtal» ýchaskesiniń jalpy 127 shaqyrymǵa jetetin 3 ýchaskesin, atap aıtqanda 1864-1905, 1905-1955 jáne 2069-2150 shaqyrymdary boıynsha jol qozǵalysyn ashý kózdelip otyr. Qazir atalǵan ýchaskelerde demalys alańdaryn, aıaldamalardy abattandyrý, jol belgilerin ornatý, sondaı-aq tańbalaý jumystary istelip jatyr. Buǵan qosa sanıtarly-gıgıenalyq toraptarmen qamtamasyz etiletin demalys alańdary da qarastyrylǵanyn aıta ketken oryndy. Sonymen birge shaǵyn bıznesti damytý men jol paıdalanýshylarynyń yńǵaılyǵy úshin jergilikti turǵyndarǵa saýda alańdaryn ornatýǵa múmkindik berilip otyr.

Tutastaı uzyndyǵy 161 shaqyrymǵa jetetin –1955-2005, 2005-2069, 2105-2152 shaqyrymyndaǵy taǵy úsh ýchaskede jóndeý jumystary jalǵasyp jatqanyn atap ótken jón. Qazir jol jabynyn tóseý men qazý jumystary júrgizilip keledi. Jyl sońyna deıin bir jolaqpen qozǵalysty qamtamasyz etý mejelengen.

Budan basqa osy ýchaskelerde sý ótkizý qubyrlary men malǵa arnalǵan ótkelderdi ornatý boıynsha jumystar aıaqtalyp, joldyń joǵary jáne tómengi qabaty tóseldi. Búginde kópirler men ótpejol sekildi jasandy qurylystardy jóndeý jumystary júrgizilip jatyr.

Osy oraıda «Balqash – Býrylbaıtal» avtojol jobasynyń qurylys jumystaryna 985 jolshy maman men 450-ge jýyq tehnıka tartylǵanyn atap ótken abzal.