«Balqash-Burylbaıtal» tasjolynyń 127 shaqyrymynda qozǵalys jandanady - QR IIDM

NUR-SULAN. QazAqparat – «Balqash-Burylbaıtal» avtojolynyń 1864-2152 shaqyrymyndaǵy ýchaskesin rekonstrýktsııalaý jobasy uzyndyǵy 288 shaqyrymdy І tehnıkalyq sanatqa aýystyra otyryp, jańartýdy kózdeıdi.

Bul týraly QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap habarlaıdy.

Joba Halyqaralyq qaıta qurý jáne damý bankiniń qaryz qarajaty jáne respýblıkalyq bıýdjetten qosa qarjylandyrý esebinen júzege asyrylady.

Ony «Sınohaıdro», «Kolın/SMS», «Todını», «SMS» merdigerlik uıymdary júzege asyrýda.

Búgingi kúnge deıin tolyq aýqymdy jumystar atqarylǵan. Atap aıtqanda, jer tósemi (12,3 mln m3), tóseletin qabat (127 km), negizgi bóliktiń tómengi qabaty (118 km), joǵarǵy qabaty (113 km) jáne tósemniń tómengi qabaty (96 km) ornatyldy. Jyl qorytyndysy boıynsha tasjoldyń 127 shaqyrymynda qozǵalys ashý josparlanýda.

Qazir merdigerler jol-qurylys jáne avtojoldy qysta kútip ustaýǵa arnalǵan materıaldardy ázirleý boıynsha is-sharalar júrgizýde.

Aıta keteıik, qurylys-montajdaý jumystary 2019 jyly bastalǵan bolatyn. Nysandy 2024 jyly paıdalanýǵa berý kózdelgen.