Balqan elderiniń delegatsııasy AHQO jumysymen tanysty
Jıynǵa Horvatııanyń burynǵy prezıdenti Stepan Mesıch pen Saraevo qalasynyń meri Abdýlla Skaka, Bosnııa jáne Gertsegovına Saýda palatasynyń prezıdenti Nemanıa Vasıch jáne Balqan mańy elderi bıznes-qoǵamdastyǵynyń ókilderi qatysty.
Qazaqstan tarapynan bıznes-forýmǵa AHQO, Tikeleı ınvestıtsııalar qory, «Atameken» UKP jáne Kazakh Invest ókilderi qatysty.
AHQO ókilderi delegatsııa múshelerin qarjy ortalyǵynyń Soty men Halyqaralyq Arbıtraj ortalyǵy, Qarjylyq qyzmetterdi retteý jónindegi komıtet (AFSA), Bırja - Astana International Exchange (AIX), Ekspat ortalyǵynyń jumysymen tanystyrdy.
Qazirgi ýaqytta AHQO-nyń zań sheńberinde 29 elden 280-nen astam kompanııa tirkelgen. Jıyn barysynda atalyp ótkendeı Horvatııa men Bosnııa-Gertsegovına tarapynan tirkelýge qyzyǵýshylyq bar.
Horvatııanyń burynǵy prezıdenti, qazir qoǵam-saıası qaıratkeri ári Saraevo qalasynyń Qurmetti azamaty Stepan Mesıch qarjy ortalyǵyndaǵy halyqaralyq talaptarǵa saı sot júıesi men arbıtraj ortalyǵynyń mańyzyn basa atap ótti.
«Táýelsiz Sot pen Halyqaralyq Arbıtraj ortalyǵy bar Qarjy ortalyǵy – bıznestiń jumys isteýine ońtaıly bolmaq» - dedi ol.
Negizinen Bosnııa jáne Gertsegovına ókilderinen turatyn delegatsııaǵa AHQO-nyń basym – ıslam qarjylandyrýy, qarjy tehnologııalary men «jasyl» qarjy baǵyttary tanystyryldy.
Buǵan qosa forým kezinde «Atameken» UKP, Tikeleı ınvestıtsııalar qory, Kazakh Invest-tiń áleýeti týraly da aıtyldy.
Aıta keterligi, «Astana» halyqaralyq qarjy ortalyǵy (AHQO) QR Tuńǵysh Prezıdenti Nursultan Nazarbaevtyń bastamasymen qurylǵan. AHQO-ny qurý týraly Konstıtýtsııalyq zańǵa 2015 jylǵy 7 jeltoqsanda qol qoıyldy. AHQO maqsaty-halyqaralyq deńgeıdegi qarjylyq qyzmetterdiń jetekshi ortalyǵyn qalyptastyrý. AHQO-nyń mindetteri el ekonomıkasyna ınvestıtsııalar tartýǵa yqpaldasý, qarjylyq qyzmet kórsetý salasynda ınvestıtsııalaý úshin tartymdy orta qurý, Qazaqstan Respýblıkasynyń baǵaly qaǵazdar naryǵyn damytý jáne onyń halyqaralyq kapıtal naryqtarymen ıntegratsııalanýyn qamtamasyz etý.