Balıde týrısterge mototsıklderdi jalǵa alýǵa tyıym salynbaq
Onyń ornyna týrıster týragentter usynǵan kóliktermen júredi. Bul jospar aınalasynda túrli pikirler aıtylyp jatyr, sebebi koronavırýs saldarynan shyǵynǵa batqan týrızm salasy endi qaıta qalpyna kelip jatqan bolatyn.
Jergilikti polıtsııa málimetinshe, aqpannyń sońynan naýryzdyń basyna deıin 170 shetel azamaty araldaǵy jol qozǵalysy erejesin buzǵan.
«Eger siz týrıst bolsańyz, ózińizdi soǵan saı ustańyz», dep málimdedi Balı gýbernatory Vaıan Koster. Balıge kelgen sheteldik týrıster qoǵamdyq kólik júıesi damymaǵan aralda motobaıktardy jalǵa alǵandy qup kóredi. Qos dońǵalaqty kólik keptelis kezinde de, odan tys ýaqytta da kórnekti jerlerdi aralaýǵa óte yńǵaıly qural. Boljam boıynsha, tyıym bıyl jergilikti zań aıasynda engiziledi, biraq ázirge ol qalaı qoldanylatyny belgisiz. Keıbir týroperatorlar mundaı tyıymnyń kásipterine áserin oılap, alańdap otyr. Provıntsııanyń statıstıka basqarmasynyń málimeti boıynsha, 2023 jyldyń qańtarynda eń kóp týrıst Aýstralııadan – 91 myń adam kelgen. Reseı ekinshi oryn alady. Osy aıda 22 myń Reseı azamaty Balıge saıahattaǵan.