Balı araly sheteldik týrıster úshin 2020 jyldyń sońyna deıin jabyq bolmaq
Buǵan deıin osy tanymal demalys ornynyń bıligi araldy sheteldik demalýshylar úshin kelesi aıdan bastap ashpaq bolǵan. Biraq Indonezııada Covid-19 juqtyrý jaǵdaılarynyń ósýine baılanysty jospar ózgertildi. Mundaı qadam týrızmge qatty táýeldi ekonomıkaǵa da áserin tıgizdi, dep habarlaıdy QazAqparat BBC agenttigine silteme jasap.
Jyl saıyn mıllıondaǵan sheteldikter Balıge jaǵajaılardy, kúrish alqaptary men úlken úndi hramdaryn izdep keledi. Biraq Indonezııa pandemııamen kúres sharasy retinde shekarasyn japqannan keıin olardyń sany kúrt azaıdy.
Shilde aıynan beri aral bıligi pandemııadan zardap shekken jergilikti ekonomıkanyń «júregi» bolǵan týrıstik ındýstrııaǵa kómektesý úshin jergilikti týrısterge kóp kóńil bóle bastady. Balıda jergilikti týrıster úshin jaǵajaılar, hramdar jáne basqa da kórikti jerler qaıta ashyldy.
Balı gýbernatory Vaıan Kosterdiń málimdemesinde araldyń sheteldik týrıster úshin qaıtadan qashan ashylatyny naqtylanbaǵan, biraq Indonezııa sheteldik demalýshylar úshin 2020 jyldyń sońyna deıin jabyq ekeni aıtylǵan.
Gýbernatordyń aıtýynsha, araldyń ashylýy «saqtyqty» jáne muqııat daıyndyqty qajet etedi, óıtkeni sátsiz jaǵdaılar araldyń qalpyna kelýi men bedeline nuqsan keltirýi múmkin.
Dúısenbi kúngi jaǵdaı boıynsha Balıda koronavırýs juqtyrýdyń 4576 oqıǵasy tirkelgen. 52 adam qaýipti vırýstan kóz jumǵan.
Búkil el boıynsha aýrýǵa shaldyǵýdyń 155000-nan astam oqıǵasy tirkelgen, 6759 adam qaıtys bolǵan. Bul Ońtústik-Shyǵys Azııadaǵy ólim jaǵdaılarynyń eń kóp sany ekendigi atap ótildi. Sarapshylardyń paıymdaýynsha, eger koronavırýsqa testilerdi kóptep tapsyrsa, olardyń sany da kóp bolar edi.