«Balapan» arnasy maska kıgen qaharman beınesin jasap shyǵardy

NUR-SULTAN. QazAqparat - «Qazaqstan» RTRK» AQ «Balapan» telearnasynda álemdi dendegen vırýs qaýpi men onymen kúresý joldaryn balaǵa uǵynyqty tilde jetkizetin «Betperdeli batyr» anımatsııalyq jobasy jaryq kórdi, dep habarlaıdy QazAqparat.

Jalpy 20 bólimnen turatyn mýlthıkaıa túrli shytyrman oqıǵalar arqyly kishkentaı kórermenderdi tazalyq saqtaýǵa shaqyryp, karantın sharalarynyń mańyzyn jetkizedi.

«Pandemııa bastalyp, búkil álem abdyrap jatqan kezde «Balapan» óz aldyna balalarǵa vırýstan keletin qaýip-qaterdi, odan qorǵaný tásilderin túsindirý maqsatyn qoıdy. Sol sátte arnadaǵy mýltfılm keıipkerleriniń barlyǵyna derlik maska kıgizdik. Tikeleı efırde koronavırýspen kúresýdiń joldaryn túsindiretin «Saý bolaıyq!» telejobasy efırge shyqty. Osydan keıin baryp, aldymyzǵa sýper qaharman oılap tapsaq degen jańa mindet qoıdyq. Álemdik tájirıbeni jáne óz múmkindikterimizdi saralaı kele, «Betperdeli batyr» atty jańa qaharmandy oılap taptyq. Jas kórermenderimizge áleýmettik jaýapkershiliktiń mánin osylaısha anımatsııa arqyly túsindirgimiz keldi», - deıdi «Balapan» telearnasynyń dırektory Maqpal Jumabaı.

Arna basshysynyń aıtýynsha, «Betperdeli batyr» obrazy aldyńǵy shepte júrgen dárigerlerge, qutqarýshylar men tártip saqshylaryna uqsas oılastyrylǵan.

Shytyrman oqıǵaly mýlthıkaıa «Balapan» arnasynan dúısenbi-juma kúnderi 19:20-da, al senbi-jeksenbi kúnderi 21:35-te efırge shyǵady. «Balapan» arnasy bıylǵy jyly oqý-tanymdyq, shytyrman oqıǵaly, oıyn-saýyqtyq janrda 27 anımatsııalyq joba jasap usynady.