Balanyń oınaı otyryp, rýhanı-adamgershilik turǵydan erte damýyn qolǵa alý kerek - Q. Ábildına

ASTANA. QazAqparat - Balanyń oınaı otyryp, rýhanı-adamgershilik turǵydan erte damýyn qolǵa alý kerek. Búgin QR Memlekettik hatshysy Gúlshara Ábdiqalyqovanyń jetekshiligimen ótken QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysynda komıssııa múshesi, ánshi Qaraqat Ábildına «Balalardyń erte damýy týraly» jobasyn tanystyrdy.

«Elbasynyń «Máńgilik El» ıdeıasynyń ózegi bala tárbıesinen bastalady. Osyǵan oraı, biz mektepke deıingi tárbıe men balalardy oqytýdyń oqý-ádistemelik quralyn ázirlegen bolatynbyz, joba retinde. Buny ulttyq komıssııada tanystyrǵaly otyrmyz. Bul ártúrli jastaǵy balalarǵa arnalǵan bireýi oıynshyq túrinde, bireýi oqýlyq túrinde bolyp, bala damýyna áser etedi dep oılaımyn», - dedi Qaraqat Ábildına.

Onyń aıtýynsha, jobanyń ereksheligi balanyń oınaı otyryp, kóp nársege erte bastan úırenýin qamtamasyz etý bolyp tabylady. Bul rette usynylyp otyrǵan joba oqý-ádistemelik tizbege engen. Endigi kúni standarttarǵa sáıkestený máseleleri qarastyrylady.

«Eń bastysy balanyń ana tilinde sóıleýin, oılaýyn ertegiler, halyq ánderi arqyly sińirý. Bala estý, qaıtalaý, oınaý arqyly damıdy. Budan bólek, mektepke deıingi ártúrli jasqa syzý, jazý baǵytynda da birshama dúnıelerdi qamtyp otyrmyz. Jobada balany tárbıeleý merzimin qursaqtan bastap 7 jasqa, ıaǵnı mektepke deıingi kezeń boıynsha qamtyǵymyz keledi. Balanyń oınaı júrip birden qabyldaıtyn, tez uǵyp, boıyna tez sińiretin kezeńniń biri de osy», - dedi Q. Ábildına.