Balany balabaqshadan bastap patrıottyq rýhta tárbıeleý kerek - Slavıane birlestiginiń múshesi Býsygına
Bul týraly QazAqparat HAA tilshisi habarlady.
Oǵan oblystyq assambleıa hatshylyǵynyń basshysy Láılá Tóreshova, oblystyq assambleıa janyndaǵy ǵylymı-sarapshylyq top jetekshisi, tarıh ǵylymdarynyń kandıdaty Nurlybek Myńjas, etnomádenı birlestikter, Analar keńesi, jastar qanaty, ǵylymı-sarapshylyq top, «Qazaqstan halqy Assambleıasy» kafedrasy, oblystyq, qalalyq Qoǵamdyq kelisim keńesi, qaladaǵy kásibı jáne kásibı emes medıatorlar jáne BAQ ókilderi qatysty.
Aktıv otyrysy barysynda oblystyq assambleıa janyndaǵy ǵylymı-sarapshylyq top jetekshisi, tarıh ǵylymdarynyń kandıdaty Nurlybek Myńjas «Otanymyzdyń terezesi teń turýdy basty maqsat etken Elbasynyń syndarly saıasaty qazaqstandyqtardyń múddesine baǵyttalǵan, ulttyq tarıh, búgin men bolashaqtyń qalyptasýy, ultqa degen sheksiz mahabbat júrekte saqtalýy kerek ekeni maqala mazmunynan tys qalmaǵan. Týǵan jerdiń qadir-qasıetin umytpaýǵa shaqyrǵan bastamada ulttyq bolmysty saqtaý máselesi de jan-jaqty qamtylǵandyǵy barshany qýantady. Búgin biz osy maqala tóńireginde ashyq pikir almasý ótkizý úshin bas qosyp otyrmyz», -dep atap ótti.
Al, Slavıane etnomádenı birlestiginiń múshesi Maııa Býsygına: "Óz boıymyzda jáne balalarymyzdyń boıynda jańa qazaqstandyq patrıotızmdi tárbıeleýimiz kerek. Bul eń aldymen elge jáne onyń ıgilikterine degen maqtanysh sezimin uıalatady degen Elbasynyń sózin tolyqtaı qoldaımyn. Balany balabaqshadan bastap patrıottyq rýhta tárbıeleý kerek. Sonda bizdiń birligimiz bekem, urpaǵymyz rýhty bolyp ósedi. Patrıottyq sezimniń nysany men qaınar kózine Otan, týǵan jer, tabıǵat, onyń baılyqtary, til, dástúr barlyq ulttyq qundylyqtar jatady. Osy qundylyqtardy ardaqtap, áspettegen el ǵana tozbaıdy. Mine, Elbasy óz maqalasynda osyǵan úlken nazar salýǵa halyqty da shaqyryp otyr. Men Qazaqstanda turǵanyma 54 jyl boldy jáne ózimdi osy eldiń patrıotymyn dep tolyqtaı aıta alamyn», -dedi ol.
Jıynǵa qatysýshylar Elbasy maqalasynyń osy baǵyttary týraly aıtyp, aýqymdy tapsyrmalardy júzege asyrý joldary men onyń basymdyqtaryna toqtaldy. «Qazaqstan halqy Assambleıasy» kafedrasynyń múshesi Talǵat Teleýbaev, oblystyq Qoǵamdyq kelisim keńesiniń múshesi Aleksandr Abanın de keleli oılaryn ortaǵa saldy.
Sondaı-aq, oblystyq assambleıa janyndaǵy ǵylymı-sarapshylyq top, «Qazaqstan halqy Assambleıasy» kafedrasynyń múshelerinen quralǵan sarapshylar pikiri tyńdaldy. Básekege qabilettilik, pragmatızm, ulttyq biregeılikti saqtaý, latyn álipbıine kóshý, ulttyq kod, bilim sapasyn jaqsartý jáne taǵy basqa mańyzy joǵary máseleler talqylandy. Qatysýshylar tarapynan suraqtar qoıylyp, saraptamalyq kezdesý pikir almasýǵa jalǵasty.