Balalaryn «shahıd» qylý úshin Sham asty – jat aǵym jeteginde ketken kelinshektiń anasy

ALMATY. QazAqparat – Almaty oblysynyń turǵyny Ánııat Fazylbekova 5 jyldan beri jalǵyz qyzyn Sham elinen qashan qaıtady dep kútip júr. Qamkóńil qarııa qyzdan týǵan jıenderin kórmegeli 5 jyldan asa ýaqyt ótti.

Qyzy Aıgúl kúıeýimen, 3 balasymen Túrkııa arqyly Sırııa asyp ketken. Sodan beri jalǵyzbasty qart ana jalǵyzynyń jolyn tosyp júr.

«Jıenderimdi saǵynamyn. Túsime kiredi. Ózderiniń ketkenine amal joq qoı. Biraq balalardy da shatystyrǵanyna túsinbeımin. Bular balalarym ólse, shahıd bolady degen oımen ketti. Sırııada taǵy eki jıenim týǵan. Olardy tek vatsaptaǵy sýretten ǵana kórdim», - dedi Ánııat apaı.

Anasy qyz-kúıeýbalasynyń jolǵa jınalyp jatqanyn ańǵarmaı da qalǵan.

«Úıdi satyp basqa úı alamyz dep júrgen. Odan 1 aptaǵa shetelge baryp demalyp kelemiz dedi. Sol ketkennen habar bolmady. Keıin teledıdar kórip otyryp Sırııadan kórsetken vıdeoda kúlgin oramal taqqan ózimniń jıenimdi tanyp qaldym. Biraq, qatelestim dep ózimdi sendirýge tyrystym», - dedi Ánııat.

Qarııanyń úıine kóp uzamaı UQK qyzmetkerleri kelip álgi vıdeony kórsetken.

Sol kezde Ánııat Fazylbekova vıdeoda shynymen óziniń nemereleri ekenine senbeske amaly qalmady.

Balalardy saǵynǵanda apasy osy vıdeony qaraıdy.

«Qyzym 5-6 aı aralatyp habarlasady. Men kúnde zvondaımyn. Biraq, eshqashan qońyraýymdy alǵan emes. Olardyń únemi tildesýge múmkindigi joq. Jarytyp sóılespeıdi, bári jaqsy dep qoıa salady. Qyzym mamandyǵy zańger bolatyn. Dinge qatysy joq edi. Qalaısha basy osylaı shatyldy. Tańym bar. Qyzymnyń qaıtqysy keletinin sóz aýanynan baıqaımyn. Biraq, kelgen soń sottalamyn dep qorqa ma, álde sol jaqtaǵy bılikten qorqa ma, bilmeımin», - dedi anasy.

Sırııaǵa ketken otandastarymyz búginde Elbasy Nursultan Nazarbaevtyń qoldaýymen «Jýsan» operatsııasy arqyly elge qaıtyp jatyr.

Osy ýaqytqa deıin «Jýsan-1» operatsııasynan - 47 adam, «Jýsan-2» operatsııasynyń arqasynda - 231 adam, «Jýsan-3» operatsııasy arqyly 300-ge jýyq adam elge qaıtqan. «Jýsan-4» operatsııasynyń arqasynda qansha adam kelgeni naqty belgisiz.

QR Bilim jáne ǵylym vıtse-mınıstri Bıbigúl Asylova habarlaǵandaı, búginde 506 bala Sırııadan qaıtyp keldi. Qazirgi tańda elimizde jasóspirimderdi qoldaýǵa arnalǵan 15 áleýmettik-psıhologııalyq, quqyqtyq ortalyq jumys istep tur. Ortalyqta táýlik boıy statsıonarda 14 balaly 4 ana bar. Qalǵandary kúndizgi statsıonarda. 254 bala mektepke deıingi tárbıemen qamtylǵan. ıAǵnı, ol balalar mektepke deıingi uıymdarǵa baryp júr.

Mektepterde 153 bala oqyp jatyr. Sondaı-aq jetim qalǵan 33 bala bar. Olar jetimderge arnalǵan uıymdarǵa taratyldy.