Balalarym Kıprde oqyǵysy keldi, men olardyń tańdaýyna qurmetpen qaraımyn – Ǵylym mınıstri

ASTANA. QazAqparat – QR Ǵylym jáne joǵary bilim mınıstri Saıasat Nurbek óz balalarynyń shet memlekette bilim alýy týraly jýrnalıster suraǵyna jaýap berdi, dep habarlaıdy QazAqparat tilshisi.

Rasynda da men ýáde berdim jáne sózimde turdym, balalarym jazda elge oraldy. Olar 4 jyldan beri Soltústik Kıprde brıtandyq jeke mektepte oqyp jatyr, ózderińiz teksere alasyzdar. Ondaǵy bilim óte sapaly jáne bizdiń jeke mekteptermen salystyrǵanda anaǵurlym arzan. Biz balalarmen bul taqyrypta baıyppen sóılestik, olar aıtarlyqtaı eseıgen. Sheteldik mektepterdiń bir jaqsysy – balalardy derbes bolýǵa jáne syndarly oılaýǵa úıretedi. Balalarym óz tańdaýyn jasady, olardyń tańdaýyna qurmetpen qaraýym kerek», - dep jaýap berdi mınıstr Ortalyq kommýnıkatsııalar qyzmetinde jýrnalıst suraǵyna.

S. Nurbektiń aıtýynsha, balalary Kıprde bilim alýdy jalǵastyrýdy uıǵarǵan.

«Men de balalarymnyń tańdaýyn qurmettep, olardyń sheshimimen kelistim. Qazir barlyq kúshimdi, ýaqytymdy, energııamdy joǵary bilim men ýnıversıtet ǵylymynyń máselelerine arnap jatyrmyn. Sondyqtan, meniń jáne balalarymnyń pikirin qurmetteýdi suraımyn. Kásibı qyzmetime baılanysty kez kelgen dıalogqa, kez kelgen suraqqa, syn-eskertpeler men aqyl-keńeske ashyqpyn. Kez kelgen tilshimen jeke kezdesip, kásibı turǵyda suhbattasa alamyn. Sondyqtan bul taqyrypty jabýdy usynamyn», - dedi Saıasat Nurbek.

Buǵan deıin Ǵylym mınıstri balalaryn nege shetelde oqytqanyn túsindirip, 26 maýsym kúni balalaryn elge ákep, fotoesep jiberýge ýáde bergen edi.