Balalaryma beske oqyńdar degen talap qoıǵan emespin — Tatıana Kım

<p>ALMATY. KAZINFORM — Wildberries ınternet-dúkeniniń negizin qalaýshy, tanymal reseılik kásipker, jeti balanyń anasy Tatıana Kım Ortalyq Azııa áıelderiniń forýmynda bala tárbıesi jóninde sóz qozǵady.</p>

«Aldaryna maqsat qoıamyn. Degenmen, erkindik te bar. Mysaly, olarǵa eshqashan tek beske oqyńdar degen talap qoıǵan emespin. Balalardyń bolashaǵyna qatysty ustanymym óte qarapaıym. Ár nársege jaýapkershilikpen qarasa, óz betinshe sheshim qabyldaı bilse deımin. Men tek keńes bere alamyn, qalǵanynyń bári — tek olardyń sheshimi men erkinde», — deıdi Tatıana Kım.

Sonymen qatar, ol balalaryna gadjetti kóp ustatpaıtynyn jetkizdi.

«Men de ózge ata-ana sııaqty balalardyń gadjetti jıi qoldanýyna qarsymyn. Gadjet balanyń oılaý qabiletin tejeıdi. Óıtkeni, ınternet arqyly qajetti aqparatty izdenbeı-aq tez tabady. Mysaly, segiz jasar ulyma planshetti aptasyna eki ret, jarty saǵat ustaýyna ruqsat beremin», — dedi ol.

Internet-dúkenniń negizin qalaýshy kásibine qatysty josparymen de bólisti. Aıtýynsha, Qazaqstanda Wildberries ınternet-dúkeniniń eki haby ashylady.

«Qazaqstanda logıstıkalyq eki keshen salynady. Almaty men Astana qalasynda. Almatyda qazir jer ýchaskesin qarap jatyrmyz. Kelesi jyly qurylysy bastalady. Qazaqstan - taýar aınalymy boıynsha úshinshi el. Onyń úlesi - 60 paıyz. Biz qarqyndy damyp kelemiz. Osy elde satyp alýshylarmyz óte kóp. Sondyqtan, Qazaqstanda hab ashýdy jón kórdik», — dedi ol.