Balalarǵa qatysty jynystyq sıpattaǵy qylmys jasaǵandarǵa raqymshylyq bolmaýy tıis – Prezıdent

NUR-SULTAN. QazAqparat – Balalarǵa qatysty jynystyq sıpattaǵy qylmys jasaǵandarǵa raqymshylyq bolmaýy tıis. Bul týraly búgin Qazaqstan halqyna Joldaýyn jarııa etken QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Balalardyń qaýipsizdigi jáne quqyqtaryn qorǵaý máselesine aıryqsha nazar aýdarý qajet. Biz kámelettik jasqa tolmaǵandarǵa qatysty jynystyq sıpattaǵy áreketter úshin qylmystyq jaýapkershilikti kúsheıttik. Biraq, problema ótkir qalyp otyr. Mundaı qylmyskerler raqymshylyqqa jáne merziminen buryn bosaý quqyǵynsyz barynsha qatań jazalaýǵa laıyqty. Olar barynsha qaýipsiz mekemelerde ustalýy tıis», - dedi Memleket basshysy.

QR Prezıdenti mundaı árbir is prokýratýra organdarynyń aıryqsha baqylaýynda bolýy tıistigin basa aıtty.

«Áleýmettik jáne quqyq qorǵaý organdary tarapynan áreketsizdik nemese nemquraıly qarym-qatynas qatań jazalanýy qajet», - dedi Qasym-Jomart Toqaev.