Balalarǵa qatysty quqyq buzýshylyqtar azaıǵan – zertteý

ASTANA. QazAqparat - 2017 jyly balalarǵa qatysty quqyq buzýshylyqtar úlesi tómendedi, alaıda 2016 jylmen salystyrǵanda balalarǵa qatysty aýyr qylmystar birshama ósip otyr (2017 jyly 1,75%, 2016 jylmen salystyrǵanda 1,4%). 

Balalar quqyǵyn qorǵaý salasyndaǵy jaǵdaıdy zertteý aıasynda QR Bas prokýratýrasynyń Quqyqtyq statıstıka jáne arnaıy esep komıtetiniń resmı málimetterine júrgizilgen taldaý negizinde Sandj zertteý ortalyǵy Qazaqstanda balalardyń tolyq qaýipsizdigi qamtylmaǵan dep habarlaıdy.

Degenmen aýyrlyǵy orta quqyq buzýshylyqtar úlesi azaıdy (2016 jyly 0,5%, al 2017 jyly 0,3%). Kámeletke tolmaǵandardyń qatysýymen erekshe aýyr qylmys túrlerine jatatyn quqyq buzýshylyqtar kóbeıgen - 16,6% (2017 jyl).

Mundaǵy aıta keter jaıt, sońǵy úsh jylda quqyq  buzýshylyq azaıyp keledi. Atap aıtqanda, 2015 jyly 1% bolsa, 2016 jyly 0,7%-ǵa, 2017 jyldyń qańtar-qarasha aılarynda 0,6%-ǵa tómendegen, biraq erekshe aýyr quqyq buzýshylyqtardyń kerisinshe óse bastaǵandyǵyn atap ótken de jón. 2016 jyly balalarǵa qatysty erekshe aýyr qylmystar úlesi 2015 jylmen salystyrǵanda 4,6%-ǵa azaıǵan (2015 jyly 20,2%, al 2016 jyly 15,6%). Alaıda 2017 jyldyń qańtar-qarasha aılarynda 1%-ǵa qaıta kóterilgeni baıqalady (16,6%).

Aımaqtar boıynsha otbasy men kámeletke tolmaǵandarǵa qarsy qylmystar 10 myń adamǵa shaqqanda 1,84, Mańǵystaý oblysynda - 1,24, BQO jáne Pavlodar oblystarynda - 1,15. Eń jıi kezdesetin óńirler - OQO men Atyraý oblysy.