Balalarǵa arnalǵan tuńǵysh qazaqsha strımıng platforma iske qosyldy

NUR-SULTAN. QazAqparat - Elordada balalar men jasóspirimderge arnalǵan qazaq tilindegi tuńǵysh strımıng platformanyń tanystyrylymy ótti. ÖZINŞE dep atalatyn onlaın kınoteatrda ártúrli jastaǵy balalarǵa arnalǵan tolyqmetrli anımatsııalyq jáne kórkem fılmder, komıkster, mýlthıkaıalar, teleserıaldar, sıtkomdar toptasqan, dep habarlaıdy QazAqparat.

Jobanyń tusaýkeserine QR Aqparat jáne qoǵamdyq damý mınıstri Asqar Omarov qatysyp, platforma jumysyn meılinshe qoldaıtynyn bildirdi. Atap aıtqanda, mınıstrlik tarapynan servısti jańa kontentpen toltyrý máselesinde kómektesetinin jetkizdi.

Sonymen qatar, sharaǵa qatysqan Halyqaralyq Túrki akademııasynyń prezıdenti, «Egemen Qazaqstan» AQ Basqarma tóraǵasy Darhan Qydyráli, Májilis depýtaty Juldyz Súleımenova, «Otandastar» qorynyń tóraǵasy Abzal Saparbekuly, «AMANAT» partııasynyń hatshysy Dáýlet Káribek, Prezıdent janyndaǵy jastar keńesiniń múshesi Oljas Súleımenov quttyqtaý lebizderinde balalarǵa arnalǵan mundaı qosymshanyń ózektiligin aıtyp, jumysyna sáttilik tiledi.

Tusaýkeserge budan bólek Májilis depýtaty Eldos Abaqanov, «Rýhanı jańǵyrý» QQDI Basqarma tóraǵasynyń orynbasary Amanbek Tólepbergenov, «Balapan» arnasynyń dırektory Qymbat Dosjan, Elbasy Akademııasy QQ Basqarýshy dırektory Murat Jumanbaı, «Qazaqstan KVN Odaǵynyń» tóraǵasy Esen Eleýken, «Biz birgemiz» QQ tóraıymy Perızat Qaırat syndy qoǵam belsendileri men jýrnalıster, blogerler qatysty.

Strımıng platformanyń avtorlary, balalar kontentin jasaýshy mamandar Maqpal Jumabaı men Sandýǵash Baımahanqyzy bul jobany 2020 jyldan bastap oılastyrǵanyn aıtady.

Jobanyń brend-ambassadory Dáýlet Muqaev ta tusaýkeser saltanatynda ár ata-anaǵa balalaryna atalǵan qosymshany júktep berýge úndedi.

Onyń aıtýynsha, ÖZINŞE tek onlaın kınoteatr ǵana emes, balalarǵa ana tilinde sapaly, tárbıeli kontent usynatyn senimdi alań.

ÖZINŞE servısi Qazaqstan halqynyń 12%-yn (2 264 600 adam) quraıtyn balalardyń jáne shettegi qazaq jasóspirimderdiń suranysyna qyzmet etedi.

Mobıldi qosymshanyń ataýynyń ózi erekshe mánge ıe.

ÖZINŞE strımıng-platformasy ómirde óz qalaýyn erkin jasap, óz tańdaýymen ómir súrýge umtylǵan búgingi jańashyl jasóspirimderge arnalǵan.

Mobıldi qosymshany kez kelgen adam IOS jáne Android mobıldi operatsııalyq júıelerinde erkin jáne tegin júkteı alady.

Búginde servıske kólemi 3400 mın quraıtyn mýltserıaldar men teleserıaldardyń lıtsenzııalyq quqyqtary satyp alynyp, júkteldi.

Sonymen qatar, ÖZINŞE Nickelodeon telearnasymen jáne basqa da álemdik stýdııa ókilderimen kelissóz júrgizip jatyr.

Joba avtorlary júıeniń júıeli túrde jańaryp, tolyqtyrylyp otyratynyn aıtty.

Erekshe atap óterligi, ÖZINŞE ujymy daıyn ónimderdi satyp alýdan bólek, ózindik jobalar óndirisin qolǵa alýda.

Jýyrda balalar men jasóspirimderge arnalǵan 2 joba túsirilimi bastalady.

Strımıng platformalardyń kórermen suranysyna, qajettigine saı óz kontentin óndire bastaýy - búgingi ýaqyttyń jańa trendi.