Balalarǵa arnalǵan Pfizer/BioNTech vaktsınasy tıimdiligin kórsetti

VAShINGTON. QazAqparat – Koronavırýsqa qarsy vaktsına óndirýshilerdiń zertteýi boıynsha, Pfizer/BioNTech alty aıdan tórt jasqa deıingi kishkentaı balalardy 73,2% qorǵaıdy, dep habarlaıdy QazAqparat tilshisi News CN-ge silteme jasap.

BioNTech kompanııasynyń bas dırektory jáne quryltaıshylarynyń biri Ýgýr Sahınniń aıtýynsha, árqaısysy úsh mıkrogramnan turatyn úsh doza nárestelerge vırýsqa tózimdiliktiń joǵary deńgeıin qamtamasyz etedi.

Nemis vaktsına ázirleýshisi BioNTech jáne onyń amerıkandyq seriktesi Pfizer osy jas tobyna arnalǵan qazirgi Omicron BA.4/BA.5 nusqalaryna beıimdelgen qosvalentti vaktsınany ázirlep jatyr.

Kompanııalar AQSh-tyń Azyq-túlik jáne dári-dármek baqylaý basqarmasyna balalarǵa arnalǵan beıimdelgen vaktsınany shuǵyl maquldaýǵa ótinishin berdi. Sonymen qatar, kompanııalardyń Eýropalyq dári-dármek agenttigine ótinish berýi aldaǵy birneshe kúnde aıaqtalady dep kútilip otyr.

Qazirgi ýaqytta Germanııanyń vaktsınalaý jónindegi turaqty komıssııasy (STIKO) kovıdke qarsy ekpeni bes jastan asqan balalarǵa ǵana usynady. 11 jasqa deıingi deni saý balalar bir doza, al densaýlyǵyna qaýip tóngen nemese joǵary qaýip tobyndaǵy adamdarmen baılanysta bolatyn balalar eki dozany qabyldaýy kerek.