Balalardyń jynystyq tıispeýshiligine qarsy qylmystar 21,3% azaıdy – Bas prokýratýra

ASTANA. QazAqparat – Balalardyń jynystyq tıispeýshiligine qarsy qylmystar 21,3% azaıdy. Bul týraly Bas prokýrordyń birinshi orynbasary Tımýr Táshimbaev málim etti, dep habarlaıdy QazAqparat.

Elde qylmystar sany 1,8% (125180-den 127480-ge deıin) artqan. Alaıda, spıkerdiń aıtýynsha, jalpy krımınogendik ahýal turaqty.

Onyń ishinde múliktik qylmystar basym: urlyq 43195-ten 47163-ke deıin artty, alaıaqtyq 31925-ten 33387-ge deıin kóbeıdi.

Bul rette, tonaý (1941-den 1913-ke deıin), qaraqshylyq (174-ten 133-ke deıin) jáne buzaqylyq (2025-ten 1836-ǵa deıin) syndy paıdakúnemdik qylmystar azaıǵan.

«Balalardyń jynystyq tıispeýshiligine qarsy qylmystar 21,3%, 792-den 623-ke deıin) jáne jalpy otbasylyq-turmystyq saladaǵy qylmystar (7,2%, 727-den 675-ke deıin) edáýir azaıdy.

Ótken jyldyń osyndaı kezeńimen salystyrǵanda qarjy pıramıdalaryn qurý jáne basqarýǵa qatysty isterdi tirkeý 45%, ınternet-alaıaqtyq 5% tómendedi», - dedi T.Táshimbaev eldegi krımınogendik ahýaldy jáne quqyq buzýshylyqtardyń aldyn alý sharalary talqylanǵan keńeste.

Sondaı-aq Bas prokýratýra ókili kıberqylmystar jóninde málim etti.

«Kıber-qylmyskerler ózderiniń alaıaqtyq shemalaryn ár ýaqytta jetildirip otyrady. Kóbinese halyqtyń qarajatyn aldap alý úshin olar ózderin banktiń jáne kúshtik qurylymdardyń qyzmetkeri retinde tanystyrady, jetekshi kompanııalardyń logotıpterin, tanymal medıa-adamdardyń jáne joǵarǵy laýazymdy tulǵalardyń sýretterin paıdalanady», - dedi ol.

Basty foto: magicmaman.com