Balalardyń ólimine sebep bolǵan «Dok-1 Maks» preparaty Qazaqstanda satylmaıdy – Densaýlyq mınıstrligi
«Dok-1 Maks» Qazaqstan Respýblıkasynyń aýmaǵynda tirkelmegen. Soǵan oraı satylmaıdy. QR-daǵy iri dárihana jelileri men dárilik zattar dıstrıbıýtorlarynyń resmı derekteri boıynsha bul preparat joq jáne respýblıka boıynsha satylmaıdy dep resmı málimdeımiz», - dep atap ótedi komıtetten.
Elimizdiń «Halyq densaýlyǵy jáne densaýlyq saqtaý júıesi týraly» Kodeksine sáıkes, dárilik zattardyń sapasyn baqylaý júıesi olardyń ómirlik tsıkliniń barlyq kezeńderinde iske asyrylady. Dárilik zattardyń sapasy men qaýipsizdigin retteýdiń negizgi elementi – memlekettik tirkeý. Oǵan deıin olardyń tıimdiligin, qaýipsizdigi men sapasyn keshendi baǵalaý júrgiziledi. Onsyz dárilik zat naryqqa jiberilmeıdi. Qazaqstanda tirkeler aldynda dárilik zattar men olardyń quramyna kiretin belsendi jáne qosalqy zattar, býyp-túıý materıaldary sapasyna muqııat tekseriledi.
«Sońǵy 4 jylda ár túrli óndirýshilerdiń quramynda etılenglıkoldiń qosymsha quramy joǵary bolǵan 10 dárilik preparatyn tirkeýden bas tartyldy jáne el naryǵyna jiberilmedi. «Dok-1 Maks respýblıka boıynsha anyqtalǵan jaǵdaıda zańnamaǵa sáıkes is-sharalar qabyldanatyn bolady», - dedi vedomstvodan.
Esterińizge sala keteıik, buǵan deıin Dúnıejúzilik densaýlyq saqtaý uıym COLD OUT jáne NATURCOLD jótelge qarsy úndi sıroptarynyń qaýiptiligi týraly eskertken bolatyn. Bul dárilik zattar Qazaqstanda tirkelmegen, kóterme jáne bólshek saýda segmentinde satylmaıdy.