Balalardyń oqý úlgerimin talqyǵa salýdyń keregi joq - mınıstr ata-analar jınalysy týraly

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov mekteptegi ata-analar jınalysyn ótkizý formatyn ózgertý kerektigin aıtty, dep habarlaıdy QazAqparat tilshisi.

«Mektepte ata-analar jınalysyn ótkizý máselesi buǵan deıin de birneshe ret kóterildi. Aldyńǵy jyly ata-analar jınalysyn ótkizýdiń jańa formasyna kóshý kerek degen tapsyrma berildi. Baıaǵydaǵydaı ata-analardy jınap alyp, balalarynyń oqý úlgerimi, qylyqtaryn talqyǵa salýdyń keregi joq. Basqa ata-ananyń kózinshe bireýdiń balasyn talqyǵa salmańyzdar», - dedi Ashat Aımaǵambetov atalǵan vedomstvoda ótken apparattyq jınalysta.

Mınıstrdiń aıtýynsha, pedagog ár ata-anaǵa balasynyń tárbıesi men bilimine qatysty tolyq aqparatty berýi tıis.

«Árıne, bireýlerdiń kózinshe balasyn talqylaǵannan keıin ata-analar mektep jınalysyna kelgisi kelmeıdi. Sondyqtan jınalys ótkizýdiń jańa formatyna kóshý kerek. Muǵalim ata-anaǵa balasynyń qandaı pánderdi unatatynyn nemese qandaı pánderden qosymsha sabaq kerektigin aıtyp jetkizý kerek. Jalpy ata-anamen jumys isteý mańyzdy jaıt, sondyqtan erekshe mán berý kerektigin taǵy eske salamyn», - deıdi ol.