Balalardyń kitap oqýǵa den qoıǵany qýantady – qyzylordalyq muǵalim

QYZYLORDA. QazAqparat - Qyzylordalyq ustaz Erjeńis Ábdiniń balalarǵa arnalǵan «Erjeńistiń erekshe esepteri» atty jumbaq óleńderi toptastyrylǵan kitap osydan birneshe jyl buryn jaryqqa shyqty. Atalǵan kitap oqyrman tarapynan úlken suranysqa ıe bolyp, respýblıka aımaǵyna jyldam tarap ketti. Oblys ortalyǵyndaǵy S.Tolybekov atyndaǵy №3 ІT mektep-lıtseıiniń matematıka páninen sabaq beretin ol aıtys aqyny retinde de elge keńinen tanymal, dep habarlaıdy QazAqparat tilshisi.

- Búginde balalar arasynda kitap oqýǵa degen qyzyǵýshylyq tym tómendep ketkenin jasyra almaımyz. Osyndaı ýaqytta seniń qalamyńnan týǵan dúnıeniń zor suranysqa ıe bolǵany qýantady. Aqparattyq tehnologııa damyǵan damyǵan zamanda kópshilik tarapynan seniń kitabyńa suranys artýynyń syry nede dep oılaısyń?

- Ras, bul - shyn áńgime. Balalar emes, eresekterdiń ózi kitap oqýǵa qulyqty emes. Túrli sebepti jeleý etedi. Jalpy, kitap janyńa serik bolatyn qundy qazyna.

San alýan ıgilikterge bastaıdy. Álemniń aldyńǵy qatarly elderinde kitap oqý dástúri áli kúnge deıin tolyq saqtalyp keledi. Endeshe, órkenıetke qalam basamyz desek qundy qazynany baǵalaı bileıik.

Qazir kitap dúkenine bara qalsańyz, ózge elderden kelgen shyǵarmalardan kóz súrinedi. Al qazaqshasy tym sırek. Bul kitapqa janashyr árbir azamatty oılandyrady. Atalǵan jaǵdaı meniń de janyma batyp júretin.

«Erjeńistiń erekshe esepteri» degen kitap ári óleń, ári esep túrinde jazylǵan. Oǵan qosa taqyrypqa saı túrli-tústi sýrettermen bezendirilgen.

Kitap kópshiliktiń qyzyǵýshylyǵyn týdyryp, respýblıka kólemine tyń tájirıbe retinde tarady. Balanyń tanymdyq belsendiligin damytýdyń psıhologııalyq-pedagogıkalyq aspektileri tarmaǵyna jatatyn ádistemelik qural retinde paıdalanylyp júr.

- Qazir elimizde balalardy kitapqa oqýǵa baýlý maqsatynda arnaıy jobalar júzege asyp jatyr. Bilim salasynda bul baǵytta qandaı jumystar atqarylýda?

- 2020 jyly Bilim jáne ǵylym mınıstrligi tarapynan «Oqýǵa qushtar mektep» jobasyn bekitildi. Atalǵan jobanyń paıdasy orasan dep sanaımyn. Sol arqyly mektep kitaphanalaryn qajetti kitaptarmen tolyqtyrý josparlandy.

Ustazdar aldynda oqýshylardy kitap oqýǵa qalaı baýlýǵa bolady degen saýaldar turdy. Biz bul baǵytta nátıjeli jumys atqardyq. Búginde ózim qyzmet atqaratyn №3 IT mektep-lıtseıinde oqýshylar kitap oqýyna den qoıǵany qýantady.

Osy maqsatta jumys jalǵasyp keledi. Jastardyń kitapqa degen qyzyǵýshylyǵyn arttyrý maqsatynda nátıjeli jumystar atqarylyp keledi.

- Osy maqsatta qandaı jumystar júrgizildi? Soǵan toqtala ketkenimiz artyq bolmas.

- Mekteptegi kovorkıngte «Rýhanı qazyna» degen úıirmesi bar. Alǵashqyda shaǵyn ǵana kitap oqýǵa qyzyǵýshylyq bildirdi. Al búkil mektepti qamtýdyń qıyn tıdi. Bul baǵytta «Altyn kitap» kýbogin uıymdastyryldy. Ol arqyly oqýǵa qushtar jas órender sanyn arttyrýǵa jol ashyldy.

- Qazir ómirimizge engen «kovorkıng» uǵymy ujymda qandaı mánge ıe boldy? Onyń artyqshylyǵy qandaı?

- Aıta keterligi, ol birlesip jumys isteý degendi bildiredi. Óńirdegi kópetegen kitaphanada kovorkıng ortalyqtary bar. Onyń oqyrman úshin jaqsy jaǵy kóp. Ol jergilikti turǵyndar úshin zııatkerlik demalys ornyna aınalady.

Mekteptegi kovorkıngte arnaıy top quryldy. Oǵan mektep muǵalimderi tartyldy. Atalǵan topqa ózim jetekshilik etemin. Nátıjesinde, kitap oqý daǵdysy qalyptastyrý baǵytynda josparly sharalar júrgizdik.

- Qazirge deıin qandaı jobalar júzege asty?

- «Oqýǵa qushtar mektep» jobasy aıasynda «20 mınýt kitap oqy» aktsııasyn ótkizdik. Al 5-7 synyptarǵa Tynymbaı Nurmaǵanbetovtiń «Qarlyǵashtyń uıasy» jáne jas qalamger Aızat Raqyshtyń «Aq arman aldamaıdy» povesi usynyldy.

Al, 8-10 synyp oqýshylaryna Sherhan Murtazanyń «Aı men Aısha» romany, Muqtar Maǵaýınniń «Bir atanyń balalary» jáne bashqurt jazýshysy Aıgız Baımuhametovtiń «Tastamashy, ana» shyǵarmasy oqýǵa berildi.

Balalarǵa shyǵarmany oqýǵa eki apta ýaqyt bólindi. Olar kitap oqýdyń 20 mınýtyn mektepte, qalǵan oqýyn úıde jalǵastyra alady.

Atalǵan bastama óz jemisin, aıtarlyqtaı nátıjesin berýde. Oqýshylardyń kitapqa degen qyzyǵýshylyǵy artyp, kókeıge toqyp, túsinip oqıtyndardyń qatary kóbeıdi.

- Sóz sońynda óziń jaıly aıta ketseń..

- 1991 jyly Zeınolla Shúkirov atyndaǵy №20 Bógen orta mektebin bitirdim. Odan keıin Qorqyt Ata atyndaǵy Qyzylorda memlekettik ýnıversıtetinde «Matematıka jáne ınformatıka páni muǵalimi» mamandyǵyn ıgerip shyqtym.

Men «Erjeńistiń erekshe esepteri» jumbaq-óleńder jınaǵyn shyǵardym. Sondaı-aq, búldirshinderge arnalǵan «Saýsaq álipbıi» óleńder jınaǵynyń avtorymyn.

Oǵan qosa «Mektebim meniń – maqtanym» atty oqýshylar óleńderine arnalǵan kitapty qurastyrdym. Halyqaralyq «Aıtyskerler men jyrshy-termeshiler odaǵynyń» múshesimin.

2006 jyldan beri Qyzylorda qalasyndaǵy №15 gımnazııada matematıka páni muǵalimi qyzmetin atqaryp kelemin.

2009 jyly «Oqýshylar men jasóspirimder úıinde» úıirme jetekshisi bolyp qyzmet atqardym.

2012 jyldan búgingi kúnge deıin S. Tolybekov atyndaǵy №3 ІT mektep-lıtseıinde matematıka páni muǵalimi bolyp eńbek etip kelemin.

- Áńgimeńe rahmet!