Balalardyń kanıkýly kezinde onlaın ótetin is-sharalar jospary ázirlendi

NUR-SULTAN. QazAqparat – Oqýshylar 20 naýryzdan bastap kóktemgi kanıkýlǵa shyǵady. Bul týraly elorda ákimdiginiń baspasóz ortalyǵynda ótken onlaın brıfıngte aıtyldy, dep habarlaıdy QazAqparat tilshisi.

«Biz úshin mańyzdy máseleniń biri – oqýshylardyń 20 naýryzdan bastap 31 naýryzǵa deıin sozylatyn kóktemgi kanıkýlyn ótkizý. Kanıkýl «Qazaqstan balalary – kóktemgi tamshy» uranymen ótedi. Kanıkýl kezinde oqýshylardyń paıdaly jáne belsendi qyzmetin uıymdastyrý úshin onlaın rejımde ótetin is-sharalar jospary ázirlendi», - deıdi Nur-Sultan qalasy bilim basqarmasy basshysynyń orynbasary Rımma Imangazınova.

Ol ata-analar men oqýshylardan karantın sharalaryn saqtaýdy ótindi.

«Aldymyzda meıram kúnderi men kanıkýl kútip tur. Oqýshylardyń jaqsy demalyp, tórtinshi toqsanǵa ynta-jigermen kelýine tilektespiz. Epıdemıologııalyq jaǵdaıǵa baılanysty sanıtarlyq normany saqtaýlaryńyzdy suraımyz», - deıdi ol.