Balalardy zańsyz dinı qyzmetke tartqany úshin jaza kúsheıtiledi - Ermekbaev

ASTANA. QazAqparat - QR Din isteri jáne azamattyq qoǵam mınıstri Nurlan Ermekbaevtyń aıtýynsha, dinı qyzmet jáne dinı birlestikterge arnalǵan zańnamaǵa ózgerister engizý josparlanyp otyr, dep xabarlaıdy QazAqparat tilshisi.

«Qazirgi kezde «Qazaqstan Respýblıkasynyń keıbir zańnamalyq aktileriniń dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasy ázirlenip jatyr. Zań jobasynyń negizgi normalary ishinde balalardy zańsyz dinı qyzmetke tartqany úshin jaýapkershilikti kúsheıtý máselesi bar. Sonymen birge dinı ádebıetti taratý jáne dinı saraptamany ótkizý tájirıbesin jetildirý usynylýda. Shetelde dinı bilim alý, mıssıonerlik qyzmetti retteý normalary da qarastyrylǵan. Bul bastamalardyń barlyǵyn qoǵamdyq uıymdardyń ókilderi men sarapshylar usyndy. Búgingi tańda talqylaý sharalary jalǵasýda. Zań jobasyn jyldyń aıaǵyna deıin aıaqtaýdy josparlap otyrmyz», - dedi Ermekbaev mınıstrliktiń búgingi alqa májilisinde.

Aıta keteıik, májilis kezinde mınıstr memleket pen din arasyndaǵy baılanystyń jańa modelin qalyptastyrý sharalarynyń qolǵa alynǵanyn jetkizdi. Atalǵan model din salasyndaǵy memlekettik saıasatynyń 2017-2020 jyldarǵa arnalǵan tujyrymdamasyna negizdeledi.