«Balalardy tárbıeleý isine memlekettiń de aralasqany jón» - baspasózge sholý
***
Keshe Elbasy Nursultan Nazarbaev Qazaqstanǵa resmı saparmen kelgen Aýǵanstan Islam Respýblıkasynyń Prezıdenti Mohammad Ashraf Ǵanımen kezdesti. Memleket basshylary saýda-ekonomıkalyq, kólik-tranzıttik, aýyl sharýashylyǵy jáne mádenı-gýmanıtarlyq yntymaqtastyq máselelerin talqylady. Sondaı-aq halyqaralyq jáne óńirlik qaýipsizdiktiń meılinshe ózekti jaıttary qarastyryldy. Bul jaıynda «Egemen Qazaqstan» gazetiniń senbilik sanyndaǵy «Múddeleler men múmkinshilikter ekshelgen ek i jaqty kezdesý» degen taqyryptaǵy maqalada egjeı-tegjeıli baıandalǵan. Basylymnyń jazýynsha, keńeıtilgen quramdaǵy kelissózder barysynda Elbasy Aýǵanstan Prezıdentiniń Astanaǵa alǵashqy resmı sapary eki el qarym-qatynastaryna tyń serpin beretinine senim bildirdi. Uly Dala eli men Aýǵanstannyń tarıhı turǵydan qalyptasqan dástúrli dostyq qarym-qatynastary, berik mádenı-rýhanı baılanystary bar ekenin aıtty. Qazaqstan Prezıdenti, sondaı-aq eki el arasyndaǵy qarym-qatynas birneshe ǵasyr burynǵy Qazaq handyǵy men Ahmad-shah Dýrranıdiń kezinen bastaý alatynyna da nazar aýdardy. «Brıfıng barysynda Nursultan Nazarbaev Aýǵanstannyń jer qoınaýy paıdaly qazbalarǵa baı ekenine jáne geologııalyq barlaý jumystaryna tartylýy múmkin mamandardyń Qazaqstanda da bar ekenine nazar aýdardy. Sonymen qatar Memleket basshysy kelissózder aıasynda eki eldiń tıisti qyzmetteriniń terrorızmge qarsy kúreste ózara yqpaldasý máseleleri talqylanǵanyn aıta kele, ekonomıkany damytý jáne halyqtyń ál-aýqatyn, tynyshtyq pen ózara kelisim negizinde arttyrý eki el úshin de negizgi basymdyq bolyp sanalatynyna nazar aýdardy», - dep jazady maqala avtory.
«Egemen Qazaqstan» gazeti sot júıesin jetildirýge baılanysty Memleket basshysy N.Nazarbaevtyń talaptary Parlament qabyrǵasynda qalaı oryndalyp jatqany týraly bilikti zańger, Zańnama jáne sot-quqyqtyq reformasy komıtetiniń múshesi Ońalsyn Jumabekovpen suhbat júrgizgen. Basylym tilshisiniń barlyq saýalyna tuşymdy jaýap bergen ol: «Respýblıkada sottar qaraǵan isterdiń sany jyldan-jylǵa ósip keledi. 2013 jyly sottar 1,1 mln. azamattyq, ákimshilik, qylmystyq ister qaraǵan bolsa, 2014 jyly isterdiń sany 1,2 mln.-nan asty. Sottar jeke jáne zańdy tulǵalardyń óz múddelerin qorǵaýǵa júginetin negizgi ınstantsııasyna aınaldy. Qoǵamda sottarǵa degen senim deńgeıi de ósip keledi. Bıylǵy jyldyń birinshi jartyjyldyǵynda ótkizilgen áleýmettik saýaldama nátıjesine qarasaq, respondentterdiń sot qyzmetimen qanaǵattanýshylyǵy 71,3%-ǵa jetkeni aıtyldy. Sot júıesi úshin bul jaqsy kórsetkish», - deıdi. Suhbat «Sot júıesin jetildirý zaman talaby» degen taqyryppen berilgen.
***
«Nur Otan» partııasynyń qoldaýymen Almaty ákimshiligi bas bolyp, jeltoqsan aıynyń alǵashqy kúnderi Respýblıka saraıynda alaman aıtys ótpek. Bul aıtystyń joly bólek. Bul joly aqyndar altyn dombyrany jeńip alý úshin saıysqa túsedi. Alamanǵa qatysatyn aqyndardyń eshqaısysy osal emes. Olar buǵan deıin talaı aıtystarda topqa túsip, top jarǵan kil myqtylar. Dúbirli aıtysta aıtysker aqyndar «Táýelsizdikke taǵzym» etpek. Osyǵan oraı, qazaqtyń dástúri aıtys óneriniń janashyry, belgili aqyn Júrsin Ermanǵa «Aıqyn» gazeti birqatar saýal qoıyp, tuşymdy jaýap alǵan. «Joǵaryda altyn dombyrany jeńip alǵan úsh aqynnyń atyn aıttym. Úsheýin de aıtysqa shaqyrdym. «Altyn dombyra ıegerleriniń aıtysqa qatysýǵa quqy bar» dep saıtqa da salyp qoıdyq. Balǵynbek Imashev Taldyqorǵanda ótken aıtysta «aıtysty qoıdym» degen eken. «Qatyspaımyn» dep shaqyrýymyzdan bas tartty. Jandarbek Bulǵaqov ta belgisiz sebeptermen aıtysqa qatysýdan bas tartyp otyr. Tek Muhtar Nııazov qana bar. Biz eshkimniń betinen qaǵyp, jel bop tıip otyrǵan joqpyz. Olaı isteýge sebebimiz de joq. Kez kelgen talantty aqyndardyń aıtysqa qatysýǵa múmkindigi bar. Ár óńirdiń aqyndaryn bóle jarmaı, saıysqa qatystyrýǵa tyrystyq. Bul aıtystyń taqyryby «Táýelsizdikke taǵzym». «Altyn dombyranyń» da negizgi maqsaty táýelsizdik merekesi qarsańynda aqyndardyń basyn qosyp, jyr jármeńkesin jasaý», - deıdi J.Erman.
«Eger qandaı da bir adam óz perzentin radıkaldy aǵymdarǵa ıkemdep jatsa, ol otbasynyń bala tárbıeleý isine memleket aralasýy qajet. Keshe elordada ótken «Jastar arasyndaǵy ekstremızmniń aldyn alýdyń ózekti máseleleri» atty respýblıkalyq ǵylymı-tájirıbelik konferentsııada quqyq qorǵaý vedomstvosynyń laýazymdy tulǵasy osyndaı eldi eleń etkizgen usynys aıtty», - dep jazady «Aıqyn» gazeti senbilik sanyndaǵy «Balalardy tárbıeleý isine memlekettiń de aralasqany jón» degen taqyryptaǵy maqalasynda. Basylymnyń jazýynsha, jıynda aıtylǵanyndaı, búginde Qazaqstanda barlyǵy 18 dástúrli din ókilderi «beıbitshilik pen kelisimde ómir súrip, táýelsiz memleketti nyǵaıtý jolynda eńbek etýde». Bul rette memlekettiń ustanymy aıqyn: ony Elbasynyń ózi: «memleketimizdiń zaıyrly sıpaty Qazaqstannyń tabysty damýynyń mańyzdy sharty» dep tujyrymdaǵan. Sonymen birge elimizde qaraý nıetti mıssıonerlerdiń, jat aǵym ókilderiniń beı-bereket taırańdaýyna jol berilmeýi tıis. Sonymen qatar qatysýshylar dinı ekstremıstik jáne terrorıstik uıymdardyń óz qataryna jastardy tartýyna, sonyń ishinde Taıaý Shyǵystaǵy qandy qyrǵyndarǵa jastarymyzdyń qatysýyna úlken alańdaýshylyq bildirdi. Máselen, Іshki ister mınıstrliginiń Krımınaldyq polıtsııa departamentiniń Ekstremızmge qarsy kúres basqarmasy bastyǵynyń orynbasary D.Razýevtiń pikirinshe, eń bastysy, jastarǵa ekstremızmniń dinmen eshqandaı baılanysy joqtyǵyn túsindirý kerek. «Biz, quqyq qorǵaý organynda óz jumysymyzdy qaıta qurýdamyz, dedi ol. Mysaly, ınternetti «ekstremıstik ıdeıalar taratylatyn basty kóz» retinde tanı otyryp, ózimiz de ǵalamtorǵa shyǵýdamyz. Atap aıtqanda, onlaın-konferentsııalar ótkizýdi tájirıbege engizdik. Oǵan mınıstrliktiń ortalyq apparaty da, aýmaqtyq ishki ister bólimsheleri de tartylady. Bul rette jastarmen jumysqa basa mán berýdemiz».