Balalardy saýyqtyrý uıymdarynyń elektrondy tizilimi ázirlenedi

ASTANA. QazAqparat – Elimizde balalardy saýyqtyrý uıymdarynyń elektrondyq tizilimi ázirlenedi. Bul týraly Májilis depýtattarynyń saýalyna Oqý-aǵartý mınıstri Ǵanı Beısembaevtyń jaýabynda aıtylǵan, dep habarlaıdy QazAqparat tilshisi.

«Balalardyń saýyqtyrý uıymdarynda turý jaǵdaılaryna, qurylysqa jer ýchaskesin tańdaý, jobalaý, qoldanystaǵy obektilerdi rekonstrýktsııalaý, qaıta jabdyqtaý, qaıta josparlaý jáne keńeıtý, qaıta beıindeý, sýmen jabdyqtaý, sý burý, jylýmen jabdyqtaý, jaryqtandyrý, jeldetý, aýany baptaǵa qoıylatyn biryńǵaı talaptar sanıtarııalyq qaǵıdalarda aıqyndalǵan», - delingen Oqý-aǵartý mınıstri jaýabynda.

Onyń atap ótýinshe, balalardy saýyqtyrý uıymdary balalarǵa arnalǵan qosymsha bilim berý uıymdary bolyp sanalady.

«Osy oraıda, «QR Bilim berý jáne bala quqyqtaryn qorǵaý máseleleri boıynsha keıbir zańnamalyq aktilerge ózgerister men tolyqtyrýlar engizý týraly» Qazaqstan Respýblıkasy zańy jobasynyń aıasynda «Bilim týraly», «Ruqsattar jáne habarlamalar týraly» Zańdaryna balalarǵa arnalǵan saýyqtyrý uıymdaryn habarlama jasaý jóninde ózgerister engizý qarastyrylǵan. Bul zań jobasy balalardy saýyqtyrý uıymdarynyń elektrondyq tizilimin qurýǵa jáne sáıkesinshe qorytyndy qujattarsyz ashylmaýynyń aldyn alýǵa múmkindik beredi», - dedi Ǵanı Beısembaev.