Balalardy ózimizden basqa kim qorǵaıdy: Jastar qozǵalysy bala kezinde quqyǵy taptalǵandar jaıly rolık túsirdi
Qozǵalys belsendileri osy rolık arqyly «Qazaqstandyqtar balasyn kimnen, neden qorǵaı bilý kerek» degen suraqqa jaýap izdeıdi.
Sol úshin bala kezinde quqyǵy taptalǵan keıipkerlermen suhbat júrgizip, rolık retinde yqshamdaǵan.
Qozǵalys ókilderiniń dereginshe, 2022-2023 jyldar arasynda elimizde kámeletke tolmaǵan balalarǵa qarsy qylmys sany 32% ósip, jynystyq zorlyq jaǵdaılary 2 ese jıilegen.
«Bul qaýipsiz ári baqytty balalyq shaqqa kepil bolatyndaı kórsetkish emes», - deıdi qozǵalys belsendisi Eldana Kadenova.
Rolık keıipkerleri basynan ótken qıyndyqty eske alyp, onyń saldarynan qutylý jolynda jibergen qatelikterin, sátti tájirıbesin bólisedi.
Dáýlet esimdi keıipker zorlyq-zombylyq qurbany bolǵanyn jasyrmaı aıtady.
«Men ózim úshin qıyn kezeńde ne otbasymnyń, ne qoǵamnyń tıimdi kómegin kórgen joqpyn. Psıhologtar men zańgerlerden de paıdaly kómek alǵan joqpyn. «Uıat» degen kategorııamen qoǵamdaǵy bylyqtyń bárin búrkemeleýdi mentalıtet dep túsindirýdiń kesirinen osylaı bolyp jatyr», - deıdi ol.
«Jańa adamdar» ókili bul rolık arqyly balasynyń quqyǵy taptalǵanyn jarııa etýge batyly jetpeı júrgen adamdarǵa oı salýǵa bolady degenge senedi.
Jastar áleýmettik beınerolık arqyly bala quqyǵymen qatysy bar qyzmette isteıtin qazaqstandyqtardy bul máselege beıjaı qaramaýǵa shaqyrady.
«Men analar men ákelerge, ájeler men atalarǵa, muǵalimderge, dárigerler, polıtsııa men búkil eresekterge úndeý joldaǵym keledi. Balalarymyzdy ózimizden basqa kim qorǵaı alady? Bala quqyǵy ár kezde saqtala bermeıtinin moıyndap, kúsh biriktirýge, kúresýge mindettimiz. Bizge balalarymyzdyń qaýipsizdigin qamtamasyz etý úshin kez kelgen múmkindikti paıdalaný kerek. Bul iste eresekter belsendi bolsa, balalardyń senimi de artady», - deıdi «Jańa adamdar» qozǵalysynyń belsendisi Eldana Kadenova.