Balalardy órtten qutqarǵan HQKO qyzmetkeri marapattaldy - Qostanaı
Buǵan deıin habarlaǵanymyzdaı, 21 tamyz kúni Qostanaıda otbasylyq jataqhana órtenip, 2 bala qutqaryldy. Belgili bolǵandaı, balalardy Aıdar Mustafın esimdi jigit qutqaryp qalǵan. Ol Qostanaıdaǵy mamandandyrylǵan halyqqa qyzmet kórsetý ortalyǵynda jumys isteıdi. Aıta keteıik, sol kúni Aıdarǵa Dıas Rahmetov jáne Rýslan Qurmanov esimdi eki áriptesi kómektesken.
Búgin balalardy qutqaryp, batyrlyq tanytqan jigitter aqparat jáne kommýnıkatsııalar mınıstri Dáýren Abaevtyń alǵys hatyna ıe boldy. Sondaı-aq, «Azamattarǵa arnalǵan úkimet» memlekettik korporatsııanyń basqarma tóraǵasy Abylaıhan Ospanov áriptesterine qurmet gramotasy men aqshalaı syılyq tabys etti.
«Men sonshalyqty batyrlyq tanyttym dep oılamaımyn, ózgege kómektesý árkimniń mindeti», - deıdi Aıdar Mustafın.
Eske salsaq, ol temir torlar arqyly tútinge tolǵan páterdiń terezesine órmelep shyǵyp, tómende turǵan áriptesterine bala men jasóspirimdi tabystaǵan bolatyn. Sosyn tútinge tunshyǵyp jatqan qarııalarǵa kómektesý úshin páterge kirgen. Eki oramaldy sýlap, birin qart kisilerge berse, ekinshisimen tútin kirip jatqan esikti qymtady.
Oqıǵa ornyna jetken órt sóndirýshiler men JQAJ (jyldam qımyldaıtyn arnaıy jasaq) qyzmetkerleri órt shyqqan úıdegi adamdardy syrtqa shyǵarady. Sondaı-aq olar ózgeni qutqarý úshin óz ómirin qaýipke tigip, tútinge ýlana bastaǵan Aıdarǵa da kómek kórsetti.
Aıdar, Dıas jáne Rýslan «Azamattarǵa arnalǵan úkimettiń» Qostanaı qalasyndaǵy vamandandyrylǵan halyqqa qyzmet kórsetý ortalyǵynda jumys isteıdi. Olar kúndelikti qyzmet barysynda avtokólik ıelerine anyqtamalyq aqparat berip, azamattardyń qujattaryn rásimdeıdi. Aıdar HQO júıesinde 9 jyldan beri jumys istep, jas mamandarǵa úlgi bop keledi. Endi ol tek eńbekte ǵana emes, ómirde de ózgege ónege bolýda.