Balalardy qutqaramyn dep qaza tapqan azamattyń otbasy marapattaldy - TJM
11:37, 11 Tamyz 2023
QONAEV. QazAqparat – Toǵandaǵy sýǵa batyp bara jatqan eki balany qutqaryp, taǵy ekeýin alyp shyǵý úshin qaıta umtylǵanynda ózi oralmaı qalǵan Almaty oblysynyń turǵyny Raýan Birqurmanovtyń otbasyna medal tabystaldy, dep habarlaıdy QazAqparat Tótenshe jaǵdaılar mınıstrligine silteme jasap.
Oqıǵa 2015 jylǵy 7 shildede bolǵan. Almaty oblysynyń turǵyny Raýan Birqurmanov otbasymen Qarasaı aýdany Isaevo aýylynyń janyndaǵy toǵanǵa barǵan. Osy ýaqytta 10-12 jastaǵy balalar ata-analarynyń qaraýynsyz sýǵa shomylyp júredi. Kenetten ol balalardyń sýǵa bata bastaǵanyn baıqap qalady. Oılanbastan sýǵa sekirgen azamat ul men qyzdy shyǵaryp alady. Munan soń taǵy eki balany qutqarýǵa tyrysqan. Alaıda, olarǵa qaraı súńgip ketken ol ózi qaıtyp oralǵan joq.
Tótenshe jaǵdaılar mınıstri Syrym Sháriphanov Almaty qalasyna jumys sapary kezinde Raýan Birqurmanovtyń otbasymen kezdesip, «Sýǵa batqandardy qutqarǵany úshin» medalin tabystady.