Balalardy qorǵaýǵa baǵyttalǵan jańa zań jobasynda qandaı jańashyldyq bar
Búgin «AMANAT» tóraǵasy Erlan Qoshanov Parlament Májilisinde partııa fraktsııasynyń jınalysyn ótkizdi.
Otyrysta elimizdegi otbasy, ana men bala quqyǵyn qorǵaýdyń qazirgi jaǵdaıy talqylandy.
Sondaı-aq fraktsııa jurtshylyqpen birlesip ázirlegen balalardyń qaýipsizdigin qamtamasyz etý jónindegi jańa zań jobasy tanystyryldy.
Jıyndy ashqan Erlan Qoshanov jas urpaqtyń balalyq shaǵynyń barynsha qaýipsiz ári baqytty bolýyna jaǵdaı jasaý – Memleket basshysy saıasatynyń jáne «AMANAT» partııasy basymdyǵynyń biri ekenin atap ótti.
Inklıýzıvti bilim berý jolǵa qoıylyp keledi, «Jaıly mektep» jobasy júzege asyrylyp jatyr, barlyq bastaýysh synyp oqýshylary tegin tamaqpen qamtamasyz etildi, balalarǵa arnalǵan áleýmettik tólemder ulǵaıýda.
Keler jyldan bastap buǵan deıin bolmaǵan «Ulttyq qor – balalarǵa» jańa baǵdarlamasy iske qosylady.
«Balalardyń tolyqqandy ári baqytty balalyq shaǵy úshin memlekettik deńgeıde barlyq jaǵdaı jasalyp jatyr. Degenmen, áli de sheshimin kútip otyrǵan máseleler bar. Sonyń biri – balalardy zorlyq-zombylyqtan qorǵaý. Sondyqtan Prezıdent Qasym-Jomart Toqaev Joldaýda balalardyń qaýipsizdigin qamtamasyz etý boıynsha jańa zań jobasyn ázirleýdi tapsyrdy. «AMANAT» partııasy jurtshylyqpen birge osy zań jobasyn daıyndady», - dedi partııa tóraǵasy.
Erlan Qoshanov buǵan deıin partııa áleýmettik jelilerde balalardy qorlaýmen kúresýge múmkindik beretin kıberbýllıngke qarsy zań shyǵarý bastamasyn kótergenin eske saldy.
Sondaı-aq, balalarǵa psıhologııalyq jáne ózge de kómek kórsetý úshin partııa janynan «111» senim telefony uıymdastyryldy.
Búginge deıin osy senim telefonyn 47 myńnan astam adam paıdalandy. Bul jumysty jańa deńgeıde jalǵastyrý úshin osy jobany Úkimetke berý uıǵaryldy.
Jıyn barysynda bala quqyqtary jónindegi ýákil, «AMANAT» partııasy janyndaǵy
Otbasy jáne halyqty áleýmettik qorǵaý máseleleri jónindegi respýblıkalyq keńestiń jetekshisi Dınara Zákıeva balalardyń qaýipsizdigin qamtamasyz etý jónindegi zań jobasyn tanystyrdy.
Qujatta zorlyq-zombylyqtan zardap shekken balalarǵa kómek kórsetýdiń biryńǵaı baǵdarlamasyn engizý, balalar ınfraqurylymynyń qaýipsizdigin qamtamasyz etý, kámeletke tolmaǵandarǵa qatysty jasalǵan qylmys úshin jazany qatańdatý, ozbyrlyq jasaǵan adamǵa psıhologııalyq kómek kórsetý kýrsyn engizý boıynsha normalar ázirlendi.
Sondaı-aq, kámeletke tolmaǵandarǵa qatysty jasalǵan qatygezdikke, fızıkalyq zorlyq-zombylyqqa baılanysty qylmystar úshin taraptardyń tatýlasýyna múmkindik berilmeıdi.
Jańa zań jobasynda usynylǵan ózgeristerdiń ózektiligi men mańyzyn Oqý-aǵartý mınıstri Ǵanı Beısembaev atap ótti.
Іs-shara barysynda «AMANAT» partııasynyń hatshysy Sholpan Karınova, Májilis depýtaty Edil Jańbyrshın, «Balalar qorǵaýynda» qorynyń dırektory Janar Ahmetova, Túrkistan oblysy boıynsha bala quqyqtary jónindegi ýákil Gúljan Verotskaıa, «Qorǵaý-Astana» QB basshysy Anna Ryl jáne jıynǵa qatysqan ózge de tulǵalar zań jobasyn qoldap, pikir bildirdi.
Fraktsııa otyrysyn qorytyndylaı kele, partııa tóraǵasy Erlan Qoshanov zań jobasyn jurtshylyqpen jáne múddeli memlekettik qurylymdarmen keńinen talqylanýynyń, qujatty tezirek qabyldaýdyń asa mańyzdy ekenin atap ótti.
Jańa zań jobasy elimizde balalarǵa qatysty jasalatyn zorlyq-zombylyqpen kúresýdiń memleket úshin jańa tıimdi quraly bolýy kerek.