Balalardy qaýipti jumysqa salǵan amerıkalyq kompanııa 1,5 mln dollar aıyppul tóleıdi

VAShINGTON. QazAqparat - AQSh bıligi eldiń birqatar shtatynda densaýlyǵyna qaýip tóndiretin jumys istegen 100-den astam kámeletke tolmaǵan jasóspirimdi anyqtady, dep habarlaıdy QazAqparattyń menshikti tilshisi NBC News arnasyna silteme jasap.

Eńbek departamenti eldiń eń iri fırmalarynyń biri Packers Sanitation Services Inc. kompanııasynyń segiz shtatta túngi ýaqytta 13 qasaphanany tazalap júrgen 13 jastaǵy 102 balany anyqtady. Kompanııa azyq-túliti sanıtarlyq óńdeýmen aınalysady, onyń búkil el boıynsha 700 nysanynda 17 myń jumysshysy bar.

Packers Sanitation Services Inc. AQSh-tyń ádil eńbek standarttary týraly zańyna sáıkes 1,5 mln dollar kóleminde aıyppul tóledi. Erejede eńbek zańnamasyn buza otyryp jumysqa qabyldanǵan árbir kámeletke tolmaǵan úshin 15 138 dollar óndirip alý qarastyrylǵan.

Eńbek departamenti túngi aýysymda jumys istegen balalar ótkir aralar men jabdyqtardy tazalaý úshin qaýipti hımııalyq zattardy qoldanǵanyn aıtady.

Balalardyń qorǵaýshylary zardap shekkenderdiń keıbireýleri AQSh-tyń ońtústik shekarasyn jaqynda kesip ótken kámeletke tolmaǵan bosqyndar ekenin atap ótti. Shekarada teksergennen keıin olar Densaýlyq saqtaý jáne halyqqa qyzmet kórsetý mınıstrliginiń Bosqyndardy ornalastyrý basqarmasyna tapsyryldy.

Іshki qaýipsizdik departamentiniń federaldyq tergeýshileri adam saýdasynyń yqtımaldyǵy bar-joǵyn tekserý úshin tergeý júrgizýde.

Foto: Josh Funk/AP