Balalar jylynda qandaı is-sharalar atqaryldy
«Mádenıet jáne sport mınıstrligi bıylǵy Balalar jylyn ótkizý aıasynda barlyq kózdelgen tapsyrmalar men is-sharalardy júzege asyrdy. Osy jyl ishinde 69 aýqymdy shara kózdelgen. Onyń ishinde 9 sharaǵa Mádenıet jáne sport mınstrligi negizgi oryndaýshy jáne qalǵanyna qosymsha oryndaýshy bolyp belgilendi. Barlyq jumys balalardy shyǵarmashylyq jáne sporttyq turǵydan sapaly qamtamasyz etýge baǵyttaldy. Jalpy mádenıet salasynda 1 mln-nan astam balany qamtıtyn birqatar aýqymdy jobalar júzege asty. Onyń ishinde, respýblıkalyq «Ulaǵatty urpaq» mádenı bilim berý onlaın jobasy uıymdastyryldy, qazirde ol saıttar men áleýmettik jelilerde júrgizilýde. Qazirgi tańda qaralym sany 2 mln-nan asyp otyr. «Ulaǵatty urpaq» platformasynyń maqsaty – bizdiń tarıhymyz ben mádenıetimizdi sol salanyń mamandarynyń kómegi arqyly nasıhattaý.
Ekinshi aýqymdy joba – oqýshynyń mádenı normatıvtik jobasy. Bul elimizdegi mektepterdiń 20 paıyzyn qamtydy. Balalardyń mádenı normatıvi aıasynda oqýshylar óner men mádenıette qandaı jumystardy bilýi kerek degen suraqtarǵa jaýap izdeıdi. Sonymen qatar, balalar ádebıetine arnalǵan «Dana bala» saıty iske qosyldy. Búgingi tańda 5 myńnan astam kitapty osy saıtqa ornalastyrdyq», - dedi Nurǵısa Dáýeshov.
Budan ózge, bıyl erekshe qabileti bar 250-den astam balany qamtyǵan «Talanttar aramyzda» respýblıkalyq festıvali ótken. Sondaı-aq, «Ájemniń ertegileri» atty ertegilerdiń aýdıonusqasy toptastyrylǵan onlaın platformasy qurylǵan.
«Balalarǵa arnalǵan «Meıirim» festıvali ótkizildi. Jaz mezgilinde «Jazǵy kıno» áleýmettik jobasy ótti. Sonmen qosa, jaz boıy kómekke muqtaj, kópbalaly otbasylardyń balalary úshin tegin kıno kórsetilimderi uıymdastyryldy. Balalar jyly aıasynda Ulttyq mýzeıde grafıka jáne keskindeme ónerine baýlyǵan sharalar ótkizildi», - dep túıindedi vıtse-mınıstr.