Balalar jylyna oraı memlekettik syılyq taǵaıyndaldy

ASTANA. QazAqparat – Umai ulttyq syılyǵynyń aıasynda Balalar jylyna oraı «Úzdik balalar spektakli» syılyǵy taǵaıyndaldy, dep habarlaıdy QazAqparat tilshisi.

Ortalyq kommýnıkatsııalar qyzmetinde «Umai-2022» syılyǵynyń sharttaryn tanystyrǵan QR Mádenıet jáne sport vıtse-mınıstri Nurǵısa Dáýeshov arnaıy óner nomınatsııasy taǵaıyndalǵanyn aıtty.

«Horeografııalyq óner» boıynsha «Úzdik bı ujymy», «Balettegi úzdik oryndaýshy», «Úzdik horeograf», «Úzdik balet spektakli» atalymdaryna arnaıy júlde taǵaıyndap otyrmyz. Kelesi bir nomınatsııamyz – «Beıneleý jáne sándik-qoldanbaly óner» nomınatsııasy. Bul jerde «Úzdik sándik-qoldanbaly óner týyndysy» úshin jáne «Beıneleý jáne sándik-qoldanbaly óner» atalymy boıynsha eki syılyq kórkem sýret, grafıka, sondaı-aq zamanaýı ónerdegi jumystarǵa beriledi.

Jalpy «Umai-2022» syılyǵy aıasynda Balalar jylyna oraılastyrylǵan «Úzdik balalar spektakli úshin» nomınatsııasyn qoıyp otyrmyz. Bul jerde júlde qorymyz ár nomınatsııa boıynsha 2 mln teńgeden bastalyp, 6 mln teńgege deıin belgilengen», - dedi vıtse-mınıstr.