Balalar jyly: ShQO kitaphanasy apta boıy túrli shara ótkizedi
Óskemen qalasynda ornalasqan kitaphanadaǵy «Ertegi álemine saıahat» atty tanymdyq aptalyq 9 sáýirge deıin jalǵasady. Bul kúnderi qonaqtardy túrli ertegi keıipkerleri qarsy alatyn bolady. Merekelik baǵdarlamany keshe jas oqyrmandarǵa arnalyp jasaqtalǵan «Tańǵajaıyp kitaptar álemi» atty ınteraktıvti kitap kórmesi ashty.
«Kórmede ótken jyly bastaý alyp, bıyl jalǵasyn tapqan «Balalar ádebıeti jyly» aıasynda jaryq kórgen Nesipbek Aıtulynyń «Shybyn-shirkeı», Ádildabek Salyqbaıdyń «Aıdana men Aqjoltaı», Tileýǵazy Beısembektiń «Zerek bala», Sháken Kúmisbaıulynyń «Sábı bolǵym keledi» kitaptary, kishkentaı oqyrmandardyń súıikti kitaptaryna aınalǵan «Big dream» baspasynan jaryq kórgen anımatsııalyq 4D kitaptar jáne jańa formattaǵy basqa da basylymdar usynyldy», - delingen kitaphana qyzmetkerleri taratqan aqparatta.
Búgin balalar jazýshysy Zııash Teleýovamen onlaın kezdesý ótti. Erteń «Sıqyrly qylqalam» alańqaıynda Óskemendegi «Oqýshylardyń shyǵarmashylyq saraıyndaǵy» sýret úıirmesine qatysýshylary ertegi keıipkerlerin beıneleýden sheberlik saǵattaryn júrgizedi. «Aq ájemniń ertegisinde» «Shyǵys Qazaqstan halqynyń ertegileri men ańyzdary» beınejobasyna qatysqan ertegishiler ulttyq kıimde óz halqynyń ertegilerin balalarǵa aıtyp beredi.
Al 7 sáýir kúni 11.00-de «Bilgishbek» ertegiler boıynsha kvest, vıktorına, 15.00-de «Ertegiterapııa» ertegi arqyly shyǵarmashylyq qabilet pen sanany damytýǵa baǵyttalǵan psıhologııalyq oıyn uıymdastyrylmaq.
8 sáýirde 11.00-de «Úsh toraı» qýyrshaq teatry ertegisiniń qoıylymy kórsetilse, 15.00-de «Jaqsylyq sıqyry» atty sharada meıirimdi periqyzdar balalarmen birge túrli zattardan ertegi keıipkerlerin jasaıdy.
9 sáýir kúni 11.00-de «Tazshanyń qyryq ótirigi» shyǵarmasyndaǵy Tazsha balalarmen birge kitap oqyp, oıyn oınaıdy. 14.00-de «Ertegi áýenderi» ertegisi qoıylmaq.