Balalar jyly: «Birgemiz: Sabaqtastyq» jobasyna 1,5 myń erikti tartylady
Azamattyq bastamalardy qoldaý ortalyǵynyń málimetinshe, aldaǵy úsh jylda elimizde balalar úıindegi balalar men jastarǵa tálimger bolý arqyly járdemdesýge, olardy ómirge beıimdeýge kómek kórsetýge baǵyttalǵan joba iske asyrylady. Jobanyń basty maqsaty – balalar úıleri men halyqty áleýmettik qorǵaý júıesiniń áleýmettik qyzmet kórsetý ortalyqtarynda eriktilerdiń tálimgerlik tájirıbesin engizý. Ómirlik qıyn jaǵdaıǵa tap bolǵan balalar men jastar toptaryna derbes tálimgerler bekitiledi. Sondaı-aq, «Virgemiz: Sabaqtastyq» jobasyna keminde 1,5 myń volonter tartylady. Olardyń 700-i – jastar, keminde 50-i – kúmis volonterler bolýy tıis.
Osy oraıda joba aıasynda qandaı jumystardyń júrgiziletini týraly ««Qoldau» bilim berý uıymdarynyń qamqorshylyq keńesi» qoǵamdyq birlestiginiń basshysy Farıda Raıymjanova aıtyp berdi.
«Joba aıasynda kem degende 30 shaǵyn grant júzege asyrylady. Bul eriktiler men bastamashyl toptardy kóptep tartýǵa jaqsy negiz bolmaq. Biz ınternat mekemelerinde qamqorshylyq keńester arqyly qurylýy tıis ekojúıe týraly aıtyp otyrmyz. Olar óz kezeginde áleýmettik seriktesterdi, qoǵam qaıratkerlerin, bizdiń balalarymyzǵa kómek bere alatyn belsendi adamdardy tartatyn bolady», - deıdi Farıda Raıymjanova.
Spıkerdiń aıtýynsha, belsendiler «Balalar jyly» aıasynda qamqorshylyq keńestermen, bilim berý uıymdarymen, tálimger bolǵysy keletin belsendi qazaqstandyqtarmen birlesip kollaboratsııa qurmaq. Tálimger bolatyn eriktiler balalarmen qarym-qatynas ornatady, jasóspirimderge keńes berip, olardy eresek ómirge daıyndaýǵa atsalysady.
«Birinshiden, biz eriktilerdiń eko-júıesin qurǵymyz keledi. Ekinshiden, shaǵyn granttardyń bólinetindigi mańyzdy. Bul kóptegen qyzyqty ıdeıalardy júzege asyra alatyn tálimger-eriktilerdi yntalandyrýdyń jáne jobaǵa tartýdyń jaqsy tásili. Eń bastysy, biz elimizde júıeli de turaqty tálimgerlik jobany qurǵymyz keledi», - dep túıindedi sózin Farıda Raıymjanova.
«Birgemiz: Sabaqtastyq» jobasyn iske asyrý 2024 jyldyń sońyna deıin jalǵasady. Joba operatory – Azamattyq bastamalardy qoldaý ortalyǵy.