Balalar jyly: Almaty oqýshylary qutqarýshylardan baǵaly syılyqtar aldy

ALMATY. QazAqparat - Almaty qalasynyń Tótenshe jaǵdaılar departamentinde Dúnıejúzilik azamattyq qorǵanys kúni men Qazaqstandaǵy Balalar jylyn merekeleýge arnalǵan baıqaý qorytyndysy shyǵaryldy, dep habarlaıdy QazAqparat tilshisi.

Almaty Tótenshe jaǵdaılar departamenti «Azamattyq qorǵanys salasyndaǵy úzdik mektep» baıqaýyn uıymdastyrdy. Azamattyq qorǵaý salasynda balalardy, jasóspirimder men jastardy oqytýǵa, tótenshe jaǵdaı kezinde is-qımyl daǵdylaryn, ózin-ózi qutqarý jáne ózara kómek kórsetý men tásilderin bilýge erekshe nazar aýdaryldy.

Baıqaýǵa megapolıstiń 224 mektebi qatysty. Onyń qorytyndysy boıynsha birinshi oryndy №61 jalpy bilim beretin mektep (Túrksib aýdany), ekinshi oryndy №41 jalpy bilim beretin mektep (Alataý aýdany) jáne úshinshi oryndy №157 jalpy bilim beretin mektep (Naýryzbaı aýdany) ıelendi.

Sonymen qatar, departament jeke kompanııamen birlesip «Azamattyq qorǵanys salasyndaǵy úzdik pikir» konkýrsyn uıymdastyrdy, onda 1, 2 jáne 3-oryn úshin jeńimpazdarǵa Smart-saǵat pen arnaıy dıplomdar berildi. Oǵan qalanyń 84 oqýshysy qatysty.

Barlyq jeńimpazdar men júldegerlerdi Almaty qalasy Tótenshe jaǵdaılar departamenti bastyǵynyń orynbasary Samat Asaınov quttyqtady.

15 aqpan men 25 naýryz aralyǵynda Dúnıejúzilik azamattyq qorǵanys kúnin merekeleýge arnalǵan, azamattyq qorǵanys salasyndaǵy bilimdi nasıhattaýǵa, sondaı-aq halyqty tótenshe jaǵdaı kezinde is-qımyl jasaýǵa úıretýge baǵyttalǵan is-sharalar uıymdastyrylyp, ótkizildi.

«249 myńnan astam oqýshy men stýdent qatysty. 3420 sýret baıqaýy, balalardyń qatysýymen 1544 spektakl, tárbıeshilerdiń 799 qýyrshaq spektakli, qaýipsizdik álippesi boıynsha 5360 áńgime, órt qaýipsizdigi boıynsha 2347 dıdaktıkalyq oıyn, azamattyq qorǵanys jáne TJ taqyryby boıynsha 976 óleń jáne 4281 beınerolık kórsetilimi uıymdastyryldy»,- dep atap ótti Almaty qalalyq TJD-niń baspasóz qyzmetinen.