Balalar úıleri men ınternattyq mekemeler tárbıelenýshileri arasyndaǵy alǵashqy respýblıkalyq baıqaýdyń jeńimpazdary anyqtaldy

ASTANA. 29 mamyr. QazAqparat - Balalardy qorǵaý kúniniń qarsańynda «Bolashaq» qaýymdastyǵynyń korporatıvtik qory qaıyrymdylyq maqsatpen elimizdiń balalar úıleri men ınternattyq mekemeleriniń tárbıelenýshileriniń arasynda «Men ómir súrip jatqan álem» atty birinshi respýblıkalyq baıqaýyn ótkizdi.

 16 bala baıqaý jeńimpazy atandy.   

Atalǵan is-sharanyń uıymdastyrylýyna Astana qalasyndaǵy «ıÝNESKO klýby - balalar kórkem mektebi» atsalysty. Joba demeýshisi - «QazTransGaz» AQ.  

Baıqaý balalar úıleri men ınternattardyń daryndy tárbıelenýshilerine qoldaý kórsetýge, olardyń shyǵarmashylyq sheberligin damytýǵa baǵyttalǵan. Baıqaýǵa 11-16 jas aralyǵyndaǵy balalar qatysty.  Taqyryptary: «Meniń Qazaqstanym - meniń jerim», «Biz tatýlyqta ómir súremiz!», «Meniń armanym».

11-13 jas aralyǵyndaǵylar arasynda birinshi orynǵa Almaty qalasynyń №15 mektep-ınternatynyń oqýshysy Áıgerim Omarqulova men Soltústik Qazaqstan oblysynyń Sokolov arnaıy mektep-ınternatynyń oqýshysy Vadım Ýstımırov ıe boldy. 14-16 jasta Ekibastuz qalasynyń «Úmit» balalar úıiniń tárbıelenýshisi Qarǵabaı Ábishev pen Almaty qalasynyń №9 mektep-ınternatynyń oqýshysy Amangúl Saqybekovanyń jumysy úzdik atandy.

Astana qalasynda 6-8 maýsym kúnderi ótkiziletin saltanatty is-sharada baıqaý jeńimpazdaryna dıplomadar, sertıfıkattar, baǵaly syılyqtar tabys etiledi.

Uıymdastyrýshylardyń aıtýynsha, baıqaý jyl saıyn ótkiziletin bolady.