Balalar úıi sııaqty mekemeler jetimderdi qorǵaı almaıdy - depýtat D.Nazarbaeva

ASTANA. 28 aqpan. QazAqparat - Búginde balalar úıi sııaqty memlekettik mekemelerdi jetimderdiń quqyqtaryn qorǵaý formasy retinde qarastyrǵan durys emes. Búgin Astanada bastalǵan «Sábımen kirer shańyraqtyń sáni» atty azamattyq forýmda QR Parlament Májilisiniń depýtaty, Mádenı-áleýmettik damý komıtetiniń tóraıymy Darıǵa Nazarbaeva osylaı aıtty.

Onyń aıtýynsha, jetim qalǵan balalardy qorǵaýdyń búgingi júıesi tıimsiz. «Ókinishke qaraı, bul júıe jumys istemeıdi. Onyń memleketke, qoǵamǵa jáne balalarǵa ákeler paıdasy joq. Máselen, qazirgi kezde balalar úıinde tárbıe alǵandardyń arasynda nashaqorlar nemese óz-zine qol jumsaýǵa daıar turatyn jasóspirimder kóptep kezdesedi. Negizi, búgingi álemdik tájirıbe kórsetip otyrǵandaı, balalar quqyqtaryn qorǵaý máselesi týraly aıtqan kezde, olardyń ómir súrýine qajetti jaǵdaıdan bólek problemalar kóteriledi. Al balalar úıi sııaqty mekemeler zorlyq-zombylyq oshaqtary retinde qarastyrylady. Sol sebepti biz jetimderdi balalar úıinde ustap, olardyń quqyqtaryn qorǵaı alamyz dep aıta almaımyn. Qazaqstanda balany asyrap alý, qamqorlyq pen patronat sııaqty alternatıvti joldar birinshi orynǵa shyǵýy qajet», - dep atap kórsetti D.Nazarbaeva.

D.Nazarbaeva atap kórsetkendeı, sońǵy málimet boıynsha Qazaqstanda 36,8 myń jetim bala bar. Olardyń 21,6 myńy qamqorlyqqa alynsa, 2,3 myń bala patronattyq tárbıede júr. «Demek, jetim balalardyń jartysynan kóbi otbasy jaǵdaıynda ósip keledi. Alaıda memlekettik mekemelerde shamamen 13 myń bala qalyp otyr. Bul - 13 myń taǵdyr, 13 myń qıylǵan ómir», - deıdi D.Nazarbaeva. Búginde sarapshy-mamandardyń aıtýynsha, balalar úıi sııaqty mekemelerden shyqqan jetimderdiń basym bóligi ómirge beıimdele almaı, uldar qylmysqa urynsa, qyzdar «túngi kóbelekterge» aınalady.