Balalar sportyn damytýǵa ne kedergi – Qazaqstan sportshylar odaǵy túsindirdi

ASTANA. QazAqparat – Elimizde balalar men jasóspirimder arasynda jappaı jáne kásibı sportty ilgeriletýde qandaı problemalar bar? Qazaqstan sportshylar odaǵynyń tóraǵasy Azamat Qarlyǵashev Jibek Joly telearnasyna bergen suhbatynda atalǵan máseleni kóterdi, dep habarlaıdy QazAqparat tilshisi.

«Balalar jáne jasóspirimder arasynda sportty damytýdaǵy basty problema – jattyǵatyn ınfraqurylym jetispeıdi. Aıtar bolsaq, Astana, Almatyda kórkem gımnastıkaǵa arnalǵan bıiktigi kem degende 12 metr bolatyn sporttyq qurylym joq. Atalǵan sport túriniń ózindik normalary bar. Ótken jyly tótenshe jaǵdaı boldy, qyz bala bıiktigi 2,8-3 metr bolatyn ǵımaratta gımnastıkamen aınalysqan. Sol sátte qolyndaǵy býlava (sporttyq qural) ushyp ketip, kózin jaraqattaǵan. Kórkem gımnastıkaǵa nazar aýdarýdy ata-analar da surap jatyr. Ótken jyly 250 ata-ananyń qoly qoıylǵan petıtsııa keldi. Oǵan sebep - balalar aınalysatyn sport zaldy alyp qoıyp, ony basqa sportshylarǵa bergen», – dedi Azamat Qarlyǵashev telearnaǵa bergen suhbatynda.

Onyń aıtýynsha, jappaı sportty damytýǵa qatysty shaǵym-ótinish óte kóp.

Qazaqstan sportshylar odaǵy atalǵan máseleni quzyrly organdar men depýtattardyń aldynda kóterip keledi.

«Problema shetinen sheshilip jatyr. Aınalyp kelip bıýdjetke tireletini túsinikti. Jergilikti atqarýshy organdar máselege mán berse degen tilegimiz bar. Biz kásipodaq sekildi jumys isteımiz, sportshylardyń quqyǵyn qorǵaımyz», - deıdi ol.

Búginde Qazaqstan sportshylar odaǵynyń 3 myńnan astam múshesi bar. Sol sııaqty el aýmaǵynda 19 fılıaly bar.