Balalar onkologııasy jáne gematologııa ulttyq ortalyǵy qurylýy múmkin

ASTANA. QazAqparat – Elimizde Balalar onkologııasy jáne gematologııa ulttyq ortalyǵy qurylýy múmkin. Bul jaıynda Májilis depýtattarynyń saýalyna Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń jaýabynda aıtylǵan, dep habarlaıdy QazAqparat tilshisi.

«Qazirgi ýaqytta Almaty qalasynyń densaýlyq saqtaý ınfraqurylymyn jaqsartý maqsatynda Densaýlyq saqtaý mınıstrligi qoldanystaǵy ınfraqurylymyn mindetti túrde jańarta otyryp, Akýsherlik, gınekologııa jáne perınatologııa ǵylymı ortalyǵy men Pedıatrııa jáne balalar hırýrgııasy ǵylymı ortalyǵyn biriktirý arqyly Almatyda Ana men bala ǵylymı ortalyǵyn qurý máselesin pysyqtap jatyr», - dedi Tamara Dúısenova jaýabynda.

Onyń atap ótýinshe, munan keıin Pedıatrııa jáne balalar hırýrgııasy ǵylymı ortalyǵynyń bosaǵan ǵımaraty bazasynda Balalar onkologııasy jáne gematologııa ulttyq ortalyǵy qurylmaq.

«Densaýlyq saqtaý ınfraqurylymyn jaqsartý, onyń ishinde joǵaryda atalǵan ortalyqtardy qurý máselesi Prezıdent janyndaǵy Reformalar jónindegi joǵary keńestiń 2023 jyldyń 22 maýsymynda ótken otyrysynda qarastyryldy. Osyǵan baılanysty Ulttyq balalar onkologııasy jáne gematologııa ortalyǵy qurý boıynsha saýalǵa naqty jaýap múddeli memlekettik organdarmen qosymsha pysyqtalǵan soń beriledi», - dedi vıtse-premer.