Balalar nelikten jıi qylmystyń qurbany bolady – polıtsııa taldaýy

ASTANA. QazAqparat – Ortalyq kommýnıkatsııalar qyzmetinde ótken brıfıngte ІІM Ákimshilik polıtsııa komıteti tóraǵasynyń mindetin atqarýshy Qaısar Sultanbaev qandaı sanattaǵy balalar jıi qylmystyń qurbany bolatynyn aıtty, dep habarlaıdy QazAqparat tilshisi.

«Taldaý kórsetkendeı, kámeletke tolmaǵandar kelesi sebepterge baılanysty qylmystyń qurbany bolady: balany ata-ana baqylaýynsyz qaldyrý, balanyń sengishtigi, ınternetti baqylaýsyz qoldaný, moraldyq qundylyqtar deńgeıiniń tómendigi, otbasyndaǵy nashar áleýmettik jaǵdaı. Atalǵan sebepter tek qana kúshteý sharalaryn qoldanýmen tolyq sheshilmeıdi. Áleýmettik qyzmetterdi tarta otyryp, balalardyń quqyqtaryn qorǵaý jáne úkimettik emes uıymdarmen keshendi tásil qurý qajet», - dep usynys bildirdi Qaısar Sultanbaev.

Sonymen qosa ol, jyl saıyn bala tárbıesine nemquraıly qaraǵan 1 myńǵa jýyq qazaqstandyq ata-ana quqyǵynan aıyrylatynyn málim etti.