Balalar kúnine oraı áskerı qyzmetshiler qaıyrymdylyq aktsııalaryn ótkizýde

ASTANA. QazAqparat - Halyqaralyq balalardy qorǵaý kúnin merekeleý aıasynda QR Qarýly Kúshteriniń áskerı qyzmetshileri mektepke deıingi jáne mektep jasyndaǵy jetim balalarǵa arnalǵan qaıyrymdylyq aktsııalaryn ótkizýde. Bul jaıynda QR Qorǵanys mınıstrliginen málim etti, dep habarlaıdy QazAqparat.

Vedomstvo málimetinshe, qazaqstandyq armııanyń áskerı qyzmetshileri ata-ananyń meıirimi men mahabbatyna bólenbegen balalar úshin syılyqtar tabystaı otyryp, kontserti bar naǵyz mereke ótkizýde. Sonymen, meıram qarsańynda QR QK Qurlyq áskerleri Áskerı ınstıtýty ujymy Almaty oblysyndaǵy № 1 balalar úıine bardy. Bóbekter úıiniń tárbıelenýshileri, ıaǵnı, «Jalyn» fýtbol komandasynyń múshelerine fýtbol kıimi syıǵa tartyldy. Odan basqa, QR QK ÁQK ÁShQQ áskerı bóliminiń aýmaǵynda jeke quram Ońtústik Qazaqstan oblysyndaǵy balalar úıiniń tárbıelenýshilerine arnap «Meıirimdi júrek» qaıyrymdylyq sharasyn ótkizdi. Іs-sharaǵa barlyǵy 250-den asa búldirshin qatysty. Shara ótkizilý barysynda baldyrǵandarǵa syılyqtar men táttiler tartý etildi.

«Mundaı qaıyrymdylyq aktsııalardyń ótkizilýi Qazaqstan Qarýly Kúshteriniń áskerı qyzmetshileri úshin dástúrge jáne qazaqstandyq óskeleń urpaqty rýhanı-adamgershilik turǵyda jetildirýde uzaq joldyń jalǵasyn tabýyna aınaldy jáne osyndaı is-sharalardyń ótkizilýi jetim balalardyń taǵdyry men densaýlyǵyna qoǵamnyń jaýapty bolýyna erekshe nazar aýdartýǵa múmkindik beredi», - delingen mınıstrlik aqparatynda.