Balalar quqyǵyn qorǵaý jónindegi keńes quryldy

ASTANA. QazAqparat - «Nur Otan» partııasynyń Tóraǵasy Nursultan Nazarbaevtyń tapsyrmasymen Balalar quqyǵyn qorǵaý jónindegi keńes quryldy. Bul týraly partııa basshysynyń birinshi orynbasary Máýlen Áshimbaev Feısbýktegi paraqshasynda jazdy, dep habarlaıdy QazAqparat tilshisi.

«Partııa Tóraǵasynyń tapsyrmasymen Balalar quqyǵyn qorǵaý jónindegi keńes qurdyq. Jańa Keńes ókilettikti tapsyrmalardy oryndaý úshin emes, balalar quqyǵy men múddesin qorǵaýǵa baǵyttalǵan naqty mehanızmderdi qurý úshin kúndelikti qajyrly eńbek etýge quryldy. Bul salada problemalar az emes, osy turǵyda biz máselelerdiń sheshimin tabýyna óz úlesimizdi qosýǵa tyrysamyz», - dep jazdy M.Áshimbaev.

Onyń aıtýynsha, búgin Keńestiń alǵashqy otyrysy ótti.

«Jańa qurylymnyń uıymdastyrýshylyq jáne mazmundyq máselelerimen «Balalar quqyǵyn qorǵaý» qoǵamdyq qorynyń quryltaıshysy, Astana qalasyndaǵy balalar úıiniń dırektory Dınara Zákıeva aınalysady. Oǵan barlyq suraqtar boıynsha habarlasýǵa bolady. Sondaı-aq, partııanyń barlyq fılıaldarynda bul jumysqa jaýaptylardy belgileıtin bolamyz. Basymdyqty mindet retinde qıyn áleýmettik jaǵdaıdaǵy balalary bar otbasylarǵa kómek kórsetýdi, balalar quqyǵy buzylǵan faktilerdi anyqtaý jáne olardy joıý boıynsha sharalar qabyldaýdy, sondaı-aq kópbalaly otbasylarǵa qoldaý bildirýge baǵyttalǵan sharalardy ázirleýdi qarastyryp otyrmyz», - dedi ol.

Sonymen qatar, partııa Tóraǵasynyń orynbasary Keńes jumysyna qyzyǵýshylyq tanytqan barlyq azamat, sonyń ishinde ÚEU jáne qoǵamdyq birlestikter qatysa alatynyn aıtty.