Balalar basylymdary biriktirilmeıdi – Eraly Toǵjanov

NUR-SULTAN. QazAqparat – Memleket menshigindegi balalar basylymdary biriktirilmeıdi. Bul jaıynda Májilis depýtattarynyń saýalyna QR Premer-Mınıstriniń orynbasary Eraly Toǵjanovtyń jaýabynda aıtylǵan, dep habarlaıdy QazAqparat tilshisi.

«Memleket menshigindegi «Ulan», «Drýjnye rebıata», «Aq jelken», «Baldyrǵan» balalar basylymdary biriktirilmeıdi. Olar qalyptasqan format boıynsha, ataýlary men qarjylandyrý kólemin saqtaı otyryp, jumysyn jalǵastyrady. Qazaqstan Respýblıkasy Úkimetiniń «Memlekettik menshiktiń keıbir máseleleri týraly» 2020 jylǵy 7 qarashadaǵy № 743 qaýlysyna sáıkes «Qazaq gazetteri» JShS-yn qaıta qurý jumystary onyń quramyndaǵy balalar basylymdarynyń qyzmetine yqpal etpeıdi. Seriktestikti qaıta qurýdyń nátıjesinde oǵan qosylyp jatqan respýblıkalyq gazetterdiń ákimshilik personaly ǵana ońtaılandyrylady», - delingen Eraly Toǵjanovtyń jaýabynda.

Aıta keteıik, qazirgi ýaqytta «Qazaq gazetteri» JShS quramyndaǵy «Ulan», «Drýjnye rebıata» gazetteri jáne «Aq jelken» jýrnaly aptasyna bir ret 5 000 dana tırajben, «Baldyrǵan» jýrnaly aptasyna bir ret 10 000 dana tırajben basylyp shyǵady. Olardyń elektrondyq nusqalary seriktestiktiń saıtynda qoljetimdi. 2020 jyly atalǵan balalar basylymdaryn qamtamasyz etý úshin respýblıkalyq bıýdjetten 133,7 mln teńge, al 2021 jyly 134, 7 mln teńge bólindi.