Balalar arasyndaǵy qatygezdikti azaıtý úshin daǵdarys ortalyqtaryn qoldaý qajet – sarapshy
«Biz qazir zorlyq-zombylyqtyń buryn-sońdy bolmaǵan ósimin kórip otyrmyz, tipti uldar ǵana emes, qyzdardyń da arasynda tóbeles bolyp jatyr. Asqan qatigezdik te baıqalady, bir qyz ekinshi qyzdy uryp-soǵyp qana qoımaı, mazaq etip, kıimin sheship alǵan. Oǵan qosa, balalar óz ata-anasynan zábir kórip júr, ákesi nemese anasy óz balalaryn óltirip nemese sýıtsıdqa jetkizetin nashar tendentsııany kórip otyrmyz. Bul jaǵdaılardyń bári birneshe ret júıeli túrde bolǵan», - dedi sarapshy QazAqparat tilshisine bergen suhbatynda.
Onyń aıtýynsha, barlyq qatigezdik otbasynan bastalady, turmystyq zorlyq-zombylyqty kórip ósken balalardyń býyny eseıgende de zorlyq-zombylyq tsıklin jalǵastyrady.
Mysaly turmysy tómen otbasynda bir bala ekinshisin óltirgen.
Sarapshynyń pikirinshe, zorlyq-zombylyqpen kúresý úshin daǵdarys ortalyqtaryn jetkilikti túrde qarjylandyrý qajet.
«Ádette jyl basynda daǵdarys ortalyqtary esh kómeksiz, óz qarajatyna jumys isteıdi, soǵan qaramastan adamdardy qabyldaýdy jalǵastyrady. Sonymen qatar, balalarǵa arnalǵan jańa daǵdarys ortalyqtary qurylyp, olarǵa qoldaý kórsetilýi kerek. Keńes zamanyndaǵy qıyn jaǵdaıǵa tap bolǵan otbasylardy qoldaý júıesin qaıtarý kerek. Bul – azyq-túlikke kómektesý, balany balabaqshaǵa qosý, sondaı-aq qıyn ómirlik jaǵdaıǵa tap ata-ananyń ótinishimen balalardy qysqa merzimge qaldyrý múmkindigi bolýy múmkin», - dedi A. Ryl.
Qor basshysynyń pikirinshe, otbasynda balaǵa qatysty zorlyq-zombylyq bolsa, balany otbasynan alyp qoıý algorıtmin ázirleý qajet.
Mysaly, qor qyzmetkerlerine mundaı jaǵdaılar belgili bolýy múmkin, biraq qazirgi qoldanystaǵy rásim óte uzaq.
Balany alyp qoıý birneshe shaqyrýdan keıin, másele komıssııanyń qaraýyna shyǵarylǵan soń ǵana júzege asady.
«Zorlyq-zombylyqtyń ózi ǵana emes, zorlyq-zombylyqqa qalaı jaýap berý kerektigi, kómek suraýǵa bolatyn uıymdardyń ataýy men baılanystary kórsetiletin beınerolıkter, fılmder, habarlar túsirý kerek. Mektepterde trenıng ótkizý, qaýipsizdik boıynsha sabaqtardy qosý qajet. Qazaqtildi azamattar úshin aqparattyń qoljetimdiligin arttyrǵan jón», - dep tolyqtyrdy Anna Ryl.
Aıta keteıik, Memleket basshysy Qasym-Jomart Toqaev Úkimettiń keńeıtilgen keńesinde balalarǵa qatysty jantúrshigerlik qylmystar jıilep ketkenin aıtty.
«Taǵy bir nazar aýdaratyn másele – jas urpaqtyń qaýipsizdigi. Balalarǵa qatysty jantúrshigerlik qylmystar jıilep ketti. Mundaı oqıǵalar mektepte, kóshede, tipti, úıde bolyp jatyr. Soraqy jaǵdaılar oqýshylardyń ózine qol jumsaýyna sebepker bolyp otyr», - dedi Memleket basshysy.