Balalar ádebıetin jańǵyrtý, otbasylyq tárbıe ınstıtýtyn qurý – Ulttyq komıssııa qaýlysy
Ulttyq komıssııa óz bastamalaryn jańa qujat – qaýlymen resimdedi, oǵan otyrys sońynda qol qoıyldy.
Osylaısha, Ulttyq komıssııa músheleri Memleket basshysynyń Túrkistanda ótken «Ádiletti Qazaqstan – adal azamat» Ulttyq quryltaı otyrysynda aıtylǵan usynystaryn qoldady.
Ulttyq komıssııa Memleket basshysynyń tapsyrmalaryn oryndaýdy qamtamasyz etý úshin qoǵamdyq uıymdardyń, ǵylymı ortalyqtardyń jáne memlekettik organdardyń kúsh-jigerin biriktirýge shaqyrdy.
Qol qoıylǵan qaýlyda qazir Ulttyq komıssııamen birlesip jumys istep jatqan jaýapty memlekettik organdar men ÚEU-ǵa usynystar berildi.
Onyń ishinde ata-analardyń óskeleń urpaqty tárbıeleýdegi jaýapkershiligi júıesin qalyptastyrýǵa baǵyttalǵan áleýmettik mańyzy bar jobalardy júzege asyrýdy qamtamasyz etý, oblystyq fılıaldar janynan «Otbasylyq tárbıe ınstıtýty» uıymyn qurý sııaqty usynystardy atap ótýge bolady.
Mektep baǵdarlamasyna adam quqyqtary boıynsha sabaqtardy engizý, qatygezdik pen zorlyq-zombylyqty nasıhattaıtyn resýrstardy beıtaraptandyrýdy qamtamasyz etý, Ulttyq komıssııanyń janynan qazaqstandyq ǵylymı uıymdardyń konsortsıýmyn nemese erikti birlestigin, jumyspen qamtý strategııalaryn qurý, otbasynyń qajettilikterin eskere otyryp, balalar arasynda eńbek qundylyqtaryn qalyptastyrý maqsatynda 14 jastan asqan mektep oqýshylary men stýdentterdi jumyspen qamtýǵa belsendi kómek kórsetý sharalaryna mindetti kvota bólý, kitap shyǵarý saıasatynyń tujyrymdamasyn ázirleý, kitap shyǵarýǵa bólingen jalpy somanyń 25%-yn balalar ádebıetin shyǵarýǵa bólý, memlekettik syılyqty taǵaıyndaý kezinde balalarǵa arnalǵan shyǵarmalardy jeke blok retinde qarastyrý syndy usynystardy qoldady.
QR Prezıdenti Ákimshiligi basshysynyń orynbasary, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Aıda Balaevanyń aıtýynsha, Ulttyq komıssııanyń tuǵyrnamasy Túrkistanda ótken Quryltaıda Memleket basshysy aıtqan túıtkildi máselelerdi sheshýdiń naqty sharalaryn anyqtaý úshin mazmundy dıalog júrgizýge daıyn.
«Prezıdent «Adal azamat» týraly aıta kelip, ulttyń jańa sapasyn qalyptastyrýǵa, zerdeli, ozyq, adal qazaqstandyqtardy tárbıeleýge baǵyttalǵan birqatar oıyn jetkizdi. Bul – memlekettik sektor úshin ıdeologııalyq jumystyń negizgi baǵyttary boıynsha naqty is-qımyl baǵdarlamasynyń bir túri», - dedi ol.
Ulttyq komıssııa tóraǵasynyń orynbasary Lazzat Ramazanova balalar men eresekter arasynda ekologııalyq sanaly minez-qulyqty tárbıeleýdiń mańyzdylyǵyn, sondaı-aq ulttyq qundylyqtar men otandyq brendti ilgeriletýdegi áıelderdiń rólin atap ótti. Sondaı-aq, el Prezıdenti óz sózinde balalar men jasóspirimder uıymdarynyń qyzmetine serpin berý mindetin qoıǵanyn jetkizdi.
Ulttyq komıssııa tóraǵasynyń orynbasary Elena Tarasenko jastar týrızmi ómirlik tájirıbeni jańa urpaqqa berýdiń, patrıotızmdi qalyptastyrýdyń mańyzdy joly bolyp tabylatynyn, alaıda búgingi kúni júıeli tásildiń joqtyǵyn jáne bul mańyzdy quraldyń baǵalanbaǵanyn málimdedi.
«Bıýdjettik qarajatty ońtaılandyrý jáne únemdeý qosymsha bilim berý salasyna qatysty. Búgingi tańda respýblıkada 40 jas týrıst-ólketanýshylar stantsııalary men ortalyqtary jumys isteıdi, olarda 30,5 myńnan astam mektep oqýshysy bilim alady. Alaıda, sońǵy úsh jylda ortalyqtardyń materıaldyq-tehnıkalyq jabdyqtalýy ózgerissiz qaldy. 40 stantsııanyń 17-si tıptik ǵımarattarda, 23-i beıimdelgen ǵımarattarda ornalasqan. 8 ǵımarat kúrdeli jóndeýdi qajet etedi, 2 ǵımarat apatty jaǵdaıda, 6 ǵımarat aǵymdaǵy jóndeýdi qajet etedi», - dedi ol.
E. Tarasenko ortalyqtar men stantsııalardyń jaı-kúıi, olardyń tıimdiligi máselesin zerttep, damytýdyń tujyrymdamalyq tásilderin ázirleý qajet dep sanaıdy.
Ulttyq komıssııanyń múshesi, sondaı-aq Qazaqstan halqy Assambleıasy Analar keńesiniń tóraǵasy Názıpa Shanaı basty tezısterdiń birine aınalǵan óskeleń urpaq tárbıesindegi ata-ananyń róline toqtaldy. Baıandamashy Ulttyq komıssııanyń aımaqtyq fılıaldary janynan «Otbasylyq tárbıe ınstıtýtyn» qurýdyń mańyzdylyǵyn aıtyp, «Adam quqyqtary» pánin mektepterge nelikten engizý usynylatynyn túsindirdi.
«Bolashaq urpaǵymyz sanaly qoǵamda ómir súrýi úshin, qorlaýdy toqtatý jáne otbasylyq zorlyq-zombylyqtyń aldyn alý úshin mektep júıesine osy pándi engizýdi usynamyz. Urpaǵymyz jastaıynan óz quqyǵyn qorǵap, ózgeniń quqyǵyn buzbaı, qorǵaı bilse ǵana urpaǵymyz baqytty bolady dep oılaımyz», - dedi ol .
Sondaı-aq, N. Shanaı balalar ádebıetin basyp shyǵarý júıesin jolǵa qoıý, sonymen qatar elimizde balalarǵa arnalǵan kontentti beıimdeıtin anımatsııa ortalyǵyn qurý da mańyzdy dep sanaıdy.
Ulttyq komıssııanyń qaýlyda aıtylǵan barlyq usynystary memlekettik organdardyń jumysyna engizilip, azamattyq sektormen birlesip júzege asyrylady.